Irak: pas Kohës së Ardhjes, të krishterët përgatiten për Krishtlindje.
Të krishterët irakianë përgatiten për Krishtlindje, duke e provuar e duke e dëshmuar
praninë e Krishtit, me kumtim, meditim e lutje. Që në ditët e para të Kohës së Ardhjes,
kryedioqeza e Kirkukut hapi, në katedrale, “Radion e shpresës”, që mbulon gjithë qytetin,
për ta kumtuar në të katër anët, Lajmin e mirë: “Lumni Zotit në qiell e paqe mbi tokë
njerëzve vullnetmirë”. Kështu lajmin e paqes mund ta dëgjojnë të krishterët, por edhe
besimtarët e feve të tjera, për të arritur tek rrënjët e fesë së të krishterëve, për
të kuptuar në Kë besojnë, cilat janë ritet që kremtojnë, si luten, si këndojnë e si
i meditojnë tekstet biblike, së bashku me tekstet liturgjike. Punohet me grupe e puna
është vullnetare. Në prag të festës, të rinjtë kanë përgatitur një cikël rubrikash,
me temë: “Të besosh, do të thotë të duash, e të duash, do të thotë të dhurosh”. Grupi
i familjeve të krishtera po mbledh ndihma për fëmijët e varfër. Grupi ‘Uji i gjallë’
po ndërton një Shpellë të madhe Betlehemi, me formën e çadrave të beduinëve. Do
të realizohet, pastaj, edhe një makinë, sipas modelit të slitës së Plakut të Vitit
të Ri, që do t’u shpërndajë dhurata fëmijëve të varfër, Natën e Krishlindjes. E
tronditur vazhimisht nga vështirësitë e dhuna, Kisha në Irak e kremton me fe Lindjen
e Krishtit, që vjen çdo vit, duke u bërë burim drite e shprese, në mes të problemeve
të shumta, të cilat vijojnë ta shqetësojnë fort bashkësinë e krishterë vendase edhe
në prag të Festës së madhe.