Бэнэдыкт XVI скіраваў спачувальную тэлеграму ў сувязі са смерцю кардынала Фолі
Бэнэдыкт XVI скіраваў
спачувальную тэлеграму на імя арцыбіскупа Філадэльфійскага Чарльза Чапута ў сувязі
са смерцю кардынала Джона Патрыка Фолі. Пантыфік адзначыў, што “з вялікім пачуццём
удзячнасці ўспамінае аб тым укладзе, які зрабіў памерлы іерарх у дзейнасць Апостальскай
Сталіцы працуючы ў якасці старшыні Папскай рады па сродках масавай камунікацыі, а
таксама ад імя хрысціянскіх супольнасцяў у Святой Зямлі”. Папа падкрэсліў, што “моліцца
аб тым, каб прыклад працы кардынала Фолі ў сферы СМІ быў натхненнем для іншых, каб
адкрыць важнасць сродкаў масавай камунікацыі ў абвяшчэнні Евангелля і новай евангелізацыі”.
Кардынал Джон Патрык Фолі памёр 11 снежня ў амерыканскай Філадэльфіі. Будучы
іерарх атрымаў святарскае пасвячэнне 19 мая 1962 г. у катэдральным касцёле ў Філадэльфіі,
закончыў доктарантуру ў Папскім універсітэце св. Тамаша з Аквіну ў Рыме і на працягу
доўгага часу працаваў журналістам, членам і віцэ-старшынём Каталіцкай асацыяцыі працаўнікоў
прэсы ЗША і Канады, а таксама прэс-сакратаром Канферэнцыі Біскупаў ЗША.
У
1984 г. Ян Павел ІІ прызначыў, яго старшынём Папскай камісіі па сродках масавай камунікацыі,
якая праз некалькі год была пераўтворана ў Папскую раду. У гэтым жа годзе кс. Фолі
прыняў біскупскае пасвячэнне і стаў арцыбіскупам. Акрамя таго, што іерарх узначальваў
ватыканскую дыкастэрыю, ён працаваў у якасці кіраўніка адміністратыўнай рады Ватыканскага
тэлевізійнага цэнтра і кіраўніком Ватыканскай фільматэкі.
Кардынал Фолі актыўна
падтрымліваў развіццё каталіцкіх СМІ ў краінах былога СССР, дапамагаў расійскай газеце
“Свет Еванглелия”, удзельнічаў у шматлікіх канферэнцыях і сустрэчах па праблемах рэлігіі
і СМІ.
24 лістапада 2007 г. Бэнэдыкт XVI надаў іерарху кардынальскую годнасць
і прызначыў яго Вялікім магістрам Ордэна рыцараў Святога Гроба Ерузалімскага.
Пасля
смерці амерыканскага іерарха ў Калегіі кардыналаў засталося 192 члены, з іх 109 маюць
менш 80 гадоў і таму маюць права удзельнічаць у канклаве.