Kisha në Malajzi bashkohet me pakicat e tjera, kundër ligjit anti-manifestim
Pakicat fetare në Malajzi janë shprehur kundër projektligjit, që kufizon të drejtën
për t’u mbledhur e për të manifestuar. Ky ligj, miratuar më 27 nëntor në Dhomën e
Ulët të Parlamentit të Kuala Lumpurit e në pritje të kalimit në Dhomën e Lartë, i
jep policisë më tepër pushtet për kontrolle parandaluese, përcakton vendet ku njerëzit
nuk mund të mblidhen në masë, ku përfshihen edhe vendet e kultit, vendos kushte për
zgjatjen dhe mënyrën e sjelljes së pjesëmarrësve në këto takime. Gjithashtu, autoritetet
mund të mos japin lejen për manifestime, edhe për arsye ndjeshmërie kulturore, ose
fetare. Me një deklaratë të përbashkët, përveç të krishterëve, kanë protestuar budistët,
hinduistët, sikhët dhe ndjekësit e taoizmit. Në Malajzi, rreth dy të tretat e popullsisë
janë myslimanë sunitë, rreth 19% budistë, 9% janë të krishterë e 6%, hinduistë.