Бэнэдыкт XVI на Іспанскай плошчы: Панна Марыя, як і Касцёл, нясе Езуса свету
8 снежня, ва ўрачыстасць
Беззаганага Зачацця Найсвяцейшай Панны Марыі, Святы Айцец Бэнэдыкт XVI здзейсніў традыцыйны
візіт да скульптуры Найсвяцейшай Панны Марыі, якая знаходзіцца на Іспанскай плошчы
ў Рыме. Па дарозе картэж Святога Айца спыніўся перад касцёлам Найсвяцейшай Тройцы,
дзе Пантыфіка прывіталі члены італьянскай Асацыяцыі прадпрымальнікаў. Папа прыбыў
на плошчу каля 16.00 гадзіны. Тут сабраліся прадстаўнікі мясцовых уладаў і групы вернікаў
са школ, парафій, касцёльных асацыяцый і гарадскіх прадпрыемстваў.
Пасля прачытання
ўрыўка з Адкрыцця св. Яна, Папа усклаў вянок з кветак да скульптуры Найсвяцейшай Панны
Марыі і звярнуўся да прысутных з прамовай. У ёй Святы Айцец паразважаў над апісаннем
Марыі як жанчыны апранутай у сонца, з месяцам пад нагамі і ў кароне з дванаццаці зорак
на галаве. Папа патлумачыў, што Марыя прадстаўлена як Маці Бога і Касцёла: апранутая
ў сонца – азначае, што яна апранута ў Бога, які ёсць святлом; пад нагамі мае месяц
– сімвал смерці і смяротнасці, якія перамагла; дванаццаць зорак на кароне Марыі, азначаюць
дванаццаць плямён Ізраіля і цэнтральнае месца Марыі сярод народа Божага, усёй супольнасці
святых. Паводле Папы, Марыя прадстаўляе хрысціянскую супольнасць усіх часоў. “Яна
цяжарная ў тым сэнсе, што носіць у сваім улонні Хрыста, якога дасць свету: гэта місія
Касцёла, які пілігрымуе па зямлі праз Божае суцяшэнне і пераслед з боку свету ў нясенні
Езуса людзям”, - падкрэсліў Бэнэдыкт XVI.
Пантыфік адзначыў, што перад абліччам
атак з боку “чырвонага дракона”, апісанага ў Апакаліпсісе св. Яна, Касцёл, як і Марыя,
падтрымліваецца моцай Бога, праз Яго Слова і Эўхарыстыю. “Таму негледзячы на шматлікія
нападкі і выпрабаванні, Касцёл, які церпіць пераслед, застаецца пераможцам. У гэтым
сэнсе хрысціянская супольнасць з’яўляецца прысутнасцю і гарантыяй Божай любові, супраць
усіх ненавісніцкіх і эгаістычных ідэалогій”, - сказаў Папа.
Святы Айцец адзначыў,
што адзінае, чаго павінен баяцца Касцёл – гэта грахоў сваіх членаў, таму неабходна
заўсёды ўглядацца ў прыклад Маці нябеснай і прасіць у яе дапамогі. “У ёй мы маем патрэбу,
асабліва ў такі цяжкі час для Італіі, Еўропы і ўсяго свету”, - адзначыў Бэнэдыкт XVI.