Беларусь рыхтуецца
да ўрачыстасці Божага Нараджэння. Праваслаўныя вернікі працягваюць пост, а вернікі
Каталіцкага Касцёла перажываюць Адвэнт – час радаснага чакання нараджэння Божага Сына.
У Мінска-Магілёўскай архідыяцэзіі гэта таксама і час перадсвяточных мерапрыемстваў.
Арцыбіскуп Тадэвуш Кандрусевіч – гэта стала ўжо традыцыяй – праводзіць шэраг аплаткавых
сустрэч з рознымі групамі вернікаў, - паведаміў адказны за СМІ пры Канферэнцыі Каталіцкіх
Біскупаў у Беларусі кс. Юрый Санько.
Паводле святара, усё распачнецца сустрэчай
з моладдзю 10 снежня, на якой апрача Мітрапаліта будзе прысутнічаць Апостальскі нунцый.
Ён узначаліць св. Імшу, а потым іерархі разам з моладзю складуць святочныя віншаванні.
Па традыцыі такія сустрэчы адбудуцца з медыкамі, навукоўцамі, членамі рэлігійных рухаў.
Арцыбіскуп Кандрусевіч наведае таксама цэнтр “Карытас”, сустрэнецца з дзецьмі, якія
праходзяць там рэабілітацыю, і іх бацькамі. Адбудуцца візіты іерарха ў Рагачоў, Жлобін,
Гомель, Баранавічы. Ён таксама сустрэнецца са святарамі і законнымі асобамі.
Галоўная
Вігілійная св. Імша, 24 снежня, адбудзецца ў мінскім архікатэдральным касцёле Імя
Найсвяцейшай Панны Марыі. Адсюль у 21.45 пачнецца прамая тэлетрансляцыя на канале
“Беларусь 1”. Святочныя літургіі апоўначы пачнуцца па ўсёй краіне. 25 снежня беларускія
вернікі непасрэдна адчуюць сваё адзінства са Сталіцай св. Пятра – у тэлеэфіры з Ватыкана
іх павіншуе на беларускай мове папа Бэнэдыкт XVI падчас святочнага “Urbi et Orbi”.
У гэты ж дзень з экранаў тэлевізараў свае віншаванні скіруе таксама арцыбіскуп Тадэвуш
Кандрусевіч у праграме “Слова пастыра”. Cапраўды, здаецца, кожны год – і чаканне,
і мітусня, і ёлкі. Усё аднолькава. Але чамусці заўсёды ў цэнтры застаецца і аказваецца
такім непаўторным – Божае Нараджэнне.