Do të paraqiten nesër, në Saha Square, lagje e krishterë e Jeruzalemit të lashtë,
në Viset Shenjte, punimet e ndjekura nga Rojtaria e Tokës Shenjte për të vënë në jetë
projektin “Jeruzalemi, gurët e kujtesës”, organizuar në bashkëpunim me UNESCO-n. Projekti
ka për qëllim të mbrojë e trashëgiminë kulturore të qytetit të vjetër të Jeruzalemit,
duke përballuar emergjencën e ndërtimit të banesave, ndjekur nga Zyra Teknike e Rojtarisë,
falë ndihmës bujare të dhuruesve privatë e publikë. Fondet e vëna në dispozicion nga
Organizata për Edukimin, Shkencën e Kulturën (UNESCO) u përdorën, në radhë të parë,
për të restauruar fasadat e kompleksit “Al Saha”, duke i dhënë punë shumë punëtorëve.
Ndërhyrja, realizuar në kuadrin e Planit të veprimit për mbrojtjen e trashëgimisë
kulturore të qytetit të vjetër të Jeruzalemit, hartuar nga UNESCO më 2003, si dhe
ndihmesa e Zyrës Italiane për bashkëpunim, krijoi mundësitë e restaurimit të Sheshit
publik e, në vijim, të edukimit të banorëve për kursimin e ujit. Më pas u përmirësuan
impiantet hidraulike më të vjetra e më të dëmtuara të qytetit të vjetër të Jeruzelemit,
duke kufizuar humbjet e ujit e me të, edhe dëmtimin e apartamenteve të kateve të
poshtme. “Jeruzalemi, gurët e kujtesës”- quhet kjo nismë, përmes së cilës bëhen
përpjekje për të ruajtur çdo gur, sepse këtu çdo gur flet, tregon një histori, e cila
nisi që kur u krijua njeriu i parë e arriti kulmin, kur një Zot lindi në një Shpellë,
mbi kashtë, pikërisht në këto vise, të dashura për mbarë njerëzimin!