Вечарам 2 снежня Бэнэдыкт
XVI прыняў удзел у адвентавым мерапрыемстве пад назвай “Надыход Божага Нараджэння
ў прыальпійскай Баварыі – З неба на зямлю”. Арганізатарам падзеі, якая прайшла ў Клеменційскай
Залі Апостальскага Палаца ў Ватыкане ў вельмі цёплай і сямейнай атмасферы, стала баварскае
тэлебачанне “Bayerischer Runfunk”. Падчас адкрыцця мерапрыемства кампазітар Ганс Бэргер
і яго творчы калектыў скіравалі да Папа музычнае прывітанне з уласных твораў на калядную
тэматыку. Затым Святому Айцу быў прадстаўлены фільм рэжысёра Зігрыд Эслінгер аб чалавечай
і духоўнай атмасферы ў час надыходу Божага Нараджэння ў прыальпійскай Баварыі, роднай
зямлі Пантыфіка, і аб традыцыйнай падрыхтоўцы да гэтай урачыстасці ў мястэчках, касцёлах,
парафіях, сем’ях рэгіёна. Бэнэдыкт XVI падзякаваў арганізатарам гэтай сустрэчы і
звярнуўся да прысутных з кароткай імправізаванай прамовай.
“У нас Адвэнт называюць
“ціхім часам” – “staаte Zeit”. Прырода нібыта замірае; зямля пакрываецца снегам; сяляне
не маюць магчымасці працаваць на вуліцы; усе больш часу праводзяць дома. Хатняя цішыня
становіцца, дзякуючы веры, чаканнем Пана, радасцю яго надзеі. І так нарадзіліся гэтыя
мелодыі і ўсе гэтыя традыцыі, якія дапамагаюць прынесці “частку неба на зямлю”.
Святы
Айцец адзначыў, што сёння, аднак, Адвэнт, у жыцці людзей, часта з’ўяляецца абсалютна
супрацьлеглым: часам вялікай актыўнасці, пакупак, продажу, падрыхтоўкі да Божага Нараджэння,
вялікіх вячэр і г.д. “Але, як мы ўбачылі народныя традыцыі веры не зніклі, але наадварот
аднаўляюцца, паглыбляюцца і развіваюцца. І так ствараюцца астравы для душы, астравы
цішыні, веры, астравы для Пана ў наш час, і гэта мне здаецца вельмі важна”, - сказаў
Святы Айцец.
Папа падкрэсліў, што мы павінны быць удзячнымі ўсім, хто спрыяе
гэтаму працэсу: сем’ям, касцёлам, прафесійным і не вельмі групам вернікаў, які спрыяюць
прысутнасці веры ў нашых дамах.