У Берліне адбылася
прэзентацыя брашуры “Пакістан: салідарнасць з хрысціянамі, якія церпяць пераслед ў
нашы часы”, выдадзенай Камісіяй па міжнародных пытаннях пры нямецкім епіскапаце. Старшыня
Камісіі арцыбіскуп Людвіг Шык, падчас прэзентацыі заявіў, што хрысціяне ў Пакістане
“лічацца грамадзянамі другога гатунку”. “Вызнаўцы Хрыста ў гэтай краіне з’яўляюцца
ахвярамі шматлікіх дыскрымінацый і пакаранняў, прычым, многія з абмежаванняў для іх
зацверджаны заканадаўствам Ісламскай Рэспублікі Пакістан”, - адзначыў нямецкі іерарх.
Арцыбіскуп Шык падкрэсліў, што “не толькі хрысціяне, але індуісты, будысты і прадстаўнікі
іншых рэлігійных меньшасцяў таксама пакутуюць ад рэлігійнай нецярпімасці і падвяргаюцца
гвалту.” Увага звярталася на небяспечны для хрысціян закон аб блюзнерстве, паводле
якога многім пагражае пажыццёвае зняволенне ці нават смерць.
Пасля прэзентацыі
справаздачы аб стане хрысціян у Пакістане група нямецкіх каталіцкіх біскупаў сустрэлася
з прадстаўнікамі розных дзяржаўных структур і членамі Бундэстага, каб непасрэдна паінфармаваць
іх аб сітуацыі ў гэтай азіяцкай краіне.