Benedikti XVI: familja, udhë e Kishës, të rikthehet protagoniste në radhët e saj
Familja është udhë e Kishës: kështu pohoi sot paradite, Papa Benedikti XVI, duke pritur
në Vatikan, pjesëmarrësit e Asamblesë së Përgjithshme të Këshillit Papnor për Familjen,
me rastin e 30-vjetorit të themelimit të dikasterit e të Nxitjes Apostolike “Familiaris
Consortio” të të Lumit Karol Vojtila. Ati i Shenjtë nënvizoi se është urgjente që
familjet e krishtera të bëhen sërish protagoniste në jetën e Kishës. Familja
është “udha e Kishës”, shpjegoi Papa, sepse është hapësira njerëzore e takimit me
Krishtin. Kjo figurë e bukur ishte qendra e fjalimit të apasionuar të Benediktit XVI
për pasurinë e dëshmisë së bashkëshortëve të krishterë. Protagonizmi i tyre duhet
të duket qartë, sidomos në fushën e edukimit të fëmijëve dhe në atë të përgatitjes
së të fejuarve për jetën martesore. E më tej, fushat e tjera: “Formimi i bashkëshortëve,
sidomos i çifteve të reja; përvoja e formimit të shoqatave me qëllime bamirëse, edukative
e impenjimi civil; baritoria e familjeve për familjet, në të gjithë harkun e jetës,
duke vlerësuar kohën e punës e atë të festës”. Benedikti XVI vuri theksin
në rolin e familjes si “Kishë shtëpiake”, nga e cila varet, në pjesën më të madhe,
ungjillëzimi i ri: “Në kohën tonë, ashtu si në epokat e kaluara, errësimi i
Zotit, përhapja e ideologjive kundër familjes dhe degradimi i etikës seksuale duken
të lidhura ndërmjet tyre. E ashtu siç janë të lidhura errësimi i Zotit dhe kriza e
familjes, ashtu edhe ungjillëzimi i ri nuk mund të ndahet nga familja e krishterë”. Bashkëshortët
e krishterë, vazhdoi Papa, janë të thirrur të ungjillëzojnë si me dëshminë e jetës,
ashtu edhe me pjesëmarrjen në veprimtaritë baritore. Familja është pasuri për bashkëshortët,
e pazëvendësueshme për fëmijët, themel i domosdoshëm i shoqërisë, bashkësi jetësore
për udhën e Kishës: “Familja e bazuar në Sakramentin e Martesës është zbatim
i veçantë i Kishës, bashkësi e shpëtuar që shpëton, bashkësi e ungjillëzuar që ungjillëzon.
Si Kisha, ajo është e thirrur ta pranojë, ta rrezatojë dhe ta tregojë në botë, dashurinë
e praninë e Krishtit”. Përçimi i dashurisë hyjnore, tha më pas Benedikti XVI,
realizohet përmes përkushtimit të bashkëshortëve për njëri-tjetrin, përmes lindjes
së fëmijëve e kujdesit të çiftit në edukimin e tyre. Realizohet gjithashtu, në punë,
në marrëdhëniet shoqërore, në vëmendjen ndaj nevojtarëve, në pjesëmarrjen në veprimtaritë
kishtare e në impenjimin qytetar: “Familja e krishterë e pasqyron në botë shkëlqimin
e Krishtit dhe bukurinë e Trinisë hyjnore, në masën me të cilën, përmes udhës së kthimit
të vazhdueshëm të zemrave kah Zoti, mbështetur nga Hiri Hyjnor, arrin ta jetojë dashurinë
si bashkim e shërbim, si dhuratë e ndërsjelltë e hapje e zemrës ndaj të gjithëve”. Papa
përfundoi, duke përmendur Takimin VII botëror të Familjeve, që do të mbahet në Milano
të Italisë, vitin e ardhshëm. Ati i Shenjtë shprehu gëzimin e tij për pjesëmarrjen
në këtë takim me familjet e krejt globit dhe falenderoi Kishën ambroziane për impenjimin
dhe mikpritjen.