Mbledhja plenare e Këshillit Papnor për Familjen. Intervistë me kardinalin Antonelli.
Familja, në plan të parë, që dje paradite, në Romë, ku u hap mbledhja plenare e Këshillit
Papnor për Familjen, që do të vijojë deri më 1 dhjetorin e ardhshëm, kur pjesëmarrësit
do të priten nga Benedikti XVI. Ngjarje e veçantë kjo, po të kemi parasysh se përkon
me 30-vjetorin e Nxitjes Apostolike të Gjon Palit II , ‘Familiaris Consortio’ dhe
të themelimit të vetë dikasterit. Do të flitet edhe mbi Takimin VII Botëror të Familjeve,
që do të mbahet në Milano, nga 30 maji, deri më 3 qershorin e vitit 2012. Me ftesën
e njohur “Familje, bëju ajo që je!”, “Familiaris Consortio” mbetet një manifest i
vërtetë për rolin e familjes në Kishë e në shoqërinë bashkëkohore. Mbi këto tema si
dhe mbi origjinalitetin e këtij dokumenti, të dëgjojmë kardinalin Ennio Antonelli,
kryetar i Këshillit Papnor për Familjen, në mikrofonin tonë:
Përgjigje:
- Origjinaliteti takohet në shumë aspekte, si në planin doktrinor, ashtu
edhe në atë baritor, përmes shumë elementeve. Në planin doktrinor, përmes pohimit
se familja e realizuar plotësisht, e aq më tepër, familja e krishterë, është pasqyrë
e vetë Hyjit, e Trinisë Shenjte, sepse bashkim i përkryer i disa njerëzve, që marrin
pjesë në jetën e Zotit. Atëherë mund të themi se vokacioni i familjes së krishterë
është ta jetojë dashurinë si dhuratë, dashurinë si bashkim, duke u bërë, kështu, figurë
e Zotit mbi tokë, zbulesë e Zotit mbi tokë. Duhet thënë se ky është vokacioni i të
gjitha familjeve, që më pas përkryhet nga Sakramenti i martesës, sakrament i besëlidhjes
së re me Zotin.
Pyetje: - Ju, me të drejtë, keni parasysh përmasën
njerëzore të familjes, duke nënvizuar edhe se mund të bëhet shprehje e realizimit
të plotë të një burri e një gruaje. Por sot modeli i këtij tipi të familjes perceptohet
si ide e Kishës, gati-gati si të ishte model fetar…
Përgjigje: -
Të gjithë e dinë, në një farë mënyre, se të jesh i vetmuar, nuk është gjë e mirë,
apo jo? Por në se vetmia është e keqe e burim i të këqijave, kjo nuk duhet të na
shtyjë të harrojmë cila është natyra e vërtetë e familjes e ta barazojmë me forma
të tjera të miqësisë, ose të bashkëjetesës. Familja, që propozon Kisha, është bashkim
i qëndrueshëm i një burri me një grua, dy vetë që janë të gatshëm për të krijuar jetë
të reja, për të lindur fëmijë. Ky tip familjeje nuk i përket vetëm kristianizmit,
por edhe kulturave të tjera.
Pyetje: - Ç’mund të na thoni për ‘Familiaris
Consortio’, 30 vjet pas botimit, e po aq edhe pas themelimit të dikasterit, që drejtoni?
Ju, që keni dëgjuar shumë çifte, a jeni i bindur se familja, e cila premton të jetë
e bashkuar gjatë gjithë jetës, të cilën e propozon edhe Kisha, vijon të jetë model
i praktikueshëm edhe në kushtet e botës së sotme? Apo vështirë të praktikohet?
Përgjigje:
- Jo, veç duhet nxitur posaçërisht familja shembullore, sepse duke parë
bërthama familjesh shembullore në çdo famulli, në lëvizjet, në shoqatat, njerëzit
shikojnë me sytë e tyre se martesa e propozuar nga Kisha, martesa e krishterë, është
e bukur, është burim gëzimi, pavarësisht nga flijimet, sepse asgjë nuk mund të arrihet
pa flijime E është në vetvete lumturi e madhe. Është e bukur, e mundshme, e realizueshme.