30 лістапада ў Кітаі
адбудзецца біскупскае пасвячэнне са згоды Апостальскай Сталіцы. 47-гадовы кс. Пітэр
Ло Ксуеган стане біскупам-каадзьютарам дыяцэзіі Ібінь (правінцыя Сычуань), паведамляе
французская інфармацыйная служба “Eglises d’Asie”. Новы біскуп атрымае права успадкаваць
катэдру 95-гадовага біскупа Джона Чэна Шычжуна, які кіруе дыяцэзіяй з 1985 г., таксама
са згоды Апостальскай Сталіцы.
У гэтым годзе па ініцыятыве кітайскай Каталіцкай
патрыятычнай асацыяцыі адбылося некалькі біскупскіх пасвячэнняў без згоды Святога
Пасаду. Што прывяло да кары суспэнзы для ўсіх пасвечаных без папскага мандату біскупаў
і некаторых іншых, якія прымалі ўдзел у абрадах.
Па дадзеных інфармацыйнай
службы, запланаванае пасвячэнне таксама не абяцае прайсці гладка. Крыніцы сцвярджаюць,
што ўлады хочуць, каб абрад узначаліў адзін з адлучаных ад Касцёла біскупаў – атрымаўшы
ў чэрвені біскупскую сакру без згоды Ватыкана, Поль Лей Шыйін.
Каля 13 млн.
з 1,3-мільярднага насельніцтва Кітая з’яўляюцца католікамі, паводле статыстыкі Апостальскай
Сталіцы, але па афіцыйных дадзеных кітайскіх уладаў, каталіцызм у краіне вызнаюць
ўсяго 6 млн. Нароўні з падпарадкавальнай уладам Каталіцкай патрыятычнай асацыяцыяй
у краіне існуе “падпольны” Касцёл, які знаходзіцца ў адзінстве з Рымам. На практыцы,
рэзкае размежаванне паміж гэтымі групамі ў апошнія гады паступова сціраецца. За выключэннем
некалькіх незаконна пасвечаных у лістападзе мінулага года біскупаў, большасць іерархаў
асацыяцыі прызнаныя Апостальскай Сталіцай.