Në tetë vende evropiane u mbajt Java e takimeve kristiano-islamike.
“Në një kohë, kur historia jonë përshkohet nga kriza e dhuna, të krishterët e myslimanët
mund të mbështeten fort mbi vlerat e fesë, prej nga buron forca e guximi për të punuar
së bashku për drejtësi e paqe”. Këtë nënvizojnë organizatorët e edicionit të 11-të
të Javës për takimet kristiano-islamike (Seric), që u mbajtën në Francë e në shtatë
vende të tjera, javën e fundit të nëntorit. Takimi - kujton gazeta vatikanase ‘L’Osservatore
Romano’, ishte pjesë përbërëse e veprimtarive, lidhur me dialogun ndërfetar. Gjatë
Javës u mbajtën konferenca, në të cilat u debatua e u dhanë dëshmi të ndryshme, nga
përfaqësues të të dyja feve. Por, Java nuk u kushtohej vetëm të krishterëve e myslimanëve.
Ajo ishte ftesë drejtuar të gjithëve, besimtarë e jo besimtarë, për të bashkëpunaur
në shërbim të drejtësisë e të paqes, në lagjen ku jetojnë, në shkollë, në vendin e
punës. Java u organizua nga Grupi i miqësisë islamo-kristiane (Gaic) i mbështetur
nga “Komiteti katolik për zhvillimin, kundër urisë”, si dhe nga “Grupi islamik francez
i ndihmës”. Shumica e takimeve u mbajtën në Paris dhe në qytete të tjera franceze.
Por nuk munguan edhe mbledhjet në Belgjikë, Hollandë, Spanjë, Itali, Poloni, Finlandë
e Mbretëri e Bashkuar. Instituti katolik ishte, të shtunën e kaluar, selia e tryezës
së rrumbullakët me temë “Të krishterët e myslimanët, përballë frikës, që buron nga
shoqëria, në të cilën jetojmë”. Gjithnjë në Paris, më 22 nëntor, u fol për “Veprimtarinë
kundër vetmisë: në qendër të vëmendjes së të krishterëve e myslimanëve”. Ndërsa
më 26 e 27 nëntor, rreth pesëdhjetë specialistë, diskutuan për arritjet më të reja
të dialogut ndërmjet të krishterëve e myslimanëve.Së fundi, në Shatenei-Malabri (Siena
e Epërme), u hap ekspozita me titull: “Al Andalus, héritage oublie?”, me shfaqje,
filma, konferenca, debate, koncerte, për të kaluar disa çaste të këndshme së bashku.