Benedikti XVI takon kryeministrin libanez: paqe e respekt për të drejtat e njeriut
në Siri
Sot paradite, Papa Benedikti XVI priti në audiencë kryetarin e Këshillit të Ministrave
të Libanit, Naxhib Mikati, i cili më pas, u takua edhe me sekretarin e shtetit të
Vatikanit, kardinalin Tarçizio Bertone dhe me atë për Marrëdhëniet me Shtetet, imzot
Dominik Mambertì. Në një komunikatë të Sallës së Shtypit të Selisë së Shenjtë njoftohet
se bisedimet ishin të përzemërta dhe vunë në dukje rolin e Libanit në rajon, sidomos
përsa i përket bashkëjetesës e respektit ndërmjet të krishterëve e myslimanëve. “Gjatë
bisedimeve – vazhdon komunikata – u fol për situatën në Lindjen e Mesme, duke iu referuar
edhe situatës delikate në Siri. Për këtë, u nënvizua urgjenca që të gjithë të impenjohen
për bashkëjetesën paqësore, të bazuar mbi drejtësinë, pajtimin dhe respektin e dinjitetit
të njeriut e të të drejtave të tij të patjetërsueshme. U përmend, së fundi, kontributi
themelor, që mund të japin për këtë qëllim të krishterët, të thirrur të jenë protagonistë
të mirëkuptimit e të paqes. Prania e tyre është thelbësore për të mirën e rajonit”.