Бэнэдыкт XVI да свецкіх вернікаў: “Пытанне аб Богу тычыцца шчасця і свабоды чалавека”
25 лістапада Бэнэдыкт
XVI прыняў на аўдыенцыі ўдзельнікаў пленарнай асамблеі Папскай рады па справах свецкіх,
якая праходзіць у Рыме. Святы Айцец звярнуўся да сабраных з прамовай у якой падзякаваў
за арганізацыю двух вялікіх падзей, якія прайшлі ў 2011 г.: Кангрэса свецкіх вернікаў
Азіі ў Сеўле і Сусветных дзён моладзі ў Мадрыдзе. Папа адзаначыў, што гэтыя мерапрыемствы
маюць асаблівае значэнне ў перспектыве маючай адбыцца ў кастрычніку 2012 г. ХІІІ Агульнай
асамблеі Сінода Біскупаў аб новай евангелізацыі і Года веры, які Касцёл перажывае
зараз. Пантыфік падкрэсліў, што тэма пленарнай асамблеі Папскай рады па справах свецкіх,
якая праходзіць у Рыме: “Пытанне аб Богу сёння”, асабліва важная ў гэтым кантэксце.
“Мы
ніколі не павінны стамляцца задаваць сабе гэта пытанне, “пачынаць ад Бога”, каб вярнуць
чалавеку поўню яго вымярэння і яго поўную годнасць”, - сказаў Папа. Святы Айцец адзначыў,
што пытанне аб Богу сёння становіцца “пытаннем з пытанняў”, якое сягае самай глыбіні
чалавека і тычыцца яго жадання праўды, шчасця і свабоды. “Чалавек, які абуджае у сабе
пытанне аб Богу адкрываецца на надзею, праўдзівую надзею, моцай якой мы можам выйсці
насустрач цяперашняму жыццю”, - сказаў Папа.
Пантыфік падкрэсліў, што вялікім
заданнем свецкіх вернікаў з’яўляецца “хрысціянскае натхненне часовага парадку”, таму,
не гледзячы на “закрытую на трасцэндэнстнасць ментальнаць” сучаснага грамадства, яны
пакліканы “сведчыць аб Богу ў сям’і, на працы, у палітыцы і эканоміцы”. Бэнэдыкт XVI
заклікаў вернікаў паглыбляць сваю веру праз пастаянны асабісты кантакт з Богам і заўсёды
ставіць Яго ў цэнтр сваіх думак і спраў.
Пленарная асамблея Папскай рады па
справах свецкіх праходзіць у Рыме 24-26 лістапада. Галоўнымі тэмамі форума з’яўляецца
“Пытанне аб Богу сёння”, а таксама аналіз працы зробленай гэтай ватыканскай дыкастэрыяй
на працягу 2011 г.