Папская рада па справах сям’і рыхтуецца адзначыць 30-годдзе дзейнасці
25 лістапада у Залі
Друку Апостальскай Сталіцы адбудзецца прэзентацыя пленарнай асамблеі Папскай рады
па справах сям’і, якая пройдзе 29 лістапада – 1 снежня з нагоды 30-годдзя публікацыі
Апостальскай адгартацыі бл. Яна Паўла ІІ “Familiaris consortio” і заснавання гэтай
ватыканскай дыкастэрыі. Старшыня Папскай рады па справах сям’і кардынал Эніо Антанэллі,
у інтэрв’ю нашаму радыё адзначыў, што праз 30 год пасля акрэслення Янам Паўлам ІІ
ідэала сапраўднай хрысціянскай сям’і ў адгартацыі “Familiaris consortio”, такі ідэал
застаецца вельмі запатрабаваным і магчымым.
“Неабходна спрыяць з’яўленню ўзорных
хрысціянскіх сем’яў, бо калі іншыя іх бачаць, у парафіях, рухах, асацыяцыях, то разумеюць,
што сужэнства, якое прапануе Касцёл, хрысціянскае сужэнства, з’яўляецца прыгожым
і дае вялікую радасць. Канешне, яно патрабуе пакоры і самаахвяравання, бо нічога прыгожага
ў гэтым жыцці не дасягаецца без ахвяравання. Такое сужэнства, дае вялікае шчасце і
з’яўляецца магчымым для рэалізацыі”.
Кардынал Антанэллі адзначыў, што праца
да падрыхтоўкі пленарнай асамблеі пачалася ўжо даўно, таму сёння ужо падрыхтавана
ўся неабходная дакументацыя, задзейнічаны шматлікія арганізацыі, валанцёры і сем’і.