Pakistani nuk e ndalon më shkrimin e emrit të Jezu Krishtit, në mesazhet përmes celularit.
Çështja u mbyll: fjala Jezu Krisht mund të shkruhet në mesazhet e dërguara nga celularët
pakistanezë, sepse është shlyer plotësisht nga lista e emrave të ndaluar, e cila pas
pak kohe do t’u shpërndahet shoqërive telefonike të vendit. Vendimtare për këtë përfundim,
ishte ndërhyrja e ministrit të harmonisë, katolikut Akram Gill, i cili foli drejtpërdrejt
me kryetarin e Autoritetit pakistanez për telekomunikacionin, duke nënvizuar se një
masë e tillë do të dëmtonte krijimin e atmosferës së bashkëjetesës paqësore ndërfetare
në Pakistan. Lajmi u përhap pak ditë më parë: ndërmjet 1600 fjalëve të ndaluara
në mesazhet telefonike e të bllokuara nga autoritetet kompetente, për t’i mbrojtur
mendjet e të rinjve, binte në sy edhe emri Jezus. I menjëhershëm, reagimi i Konferencës
ipeshkvnore vendase, që kërkoi zyrtarisht shpjegime për arsyen e ndalimit të këtij
emri, duke u drejtuar cenzorëve pyetjen: “Ç’dëm mund t’u sjellë të rinjve?”, dhe duke
denoncuar shkeljen e së drejtës për të ungjillëzuar e për të dëshmuar fenë, sanksionuar
nga Kushtetuta pakistaneze. Ndërsa tani Kisha shpreh, në agjencinë Fides, kënaqësinë
e vet për mundësinë që i krijohet të ungjillëzojë edhe përmes përdorimit të teknologjive
të reja. E po këtë kënaqësi e shprehën edhe disa shoqata për mbrojtjen e të drejtave
të njeriut, që e patën denoncuar ndalimin, si kufizim i lirisë së shprehjes, por edhe
si shkelje e së drejtës për mbrojtjen e jetës private.