Կիպրոսի Ս. Մակար Վանքը Ամբողջական Ոչնչացման Եզրին Է։
Կիպրոսի թրքական հատուածին մէջ գտնուող հայկական Ս. Մակար վանքը ոչնչացման եզրին է: Անիկա
աղբանոցի վերածուած է, եւ հայերու ուխտատեղին շուտով հողին հաւասար պիտի ըլլայ, կը հաղորդէ
ռուսական «Ռեկնում» գործակալութիւնը` վկայակոչելով «Սայփրըս Մէյլ» օրաթերթը։ Պատմաբանները
կը նշեն, որ վանքը հիմնադրուած է 1000 թուականին ղպտիներու կողմէ` 4-րդ դարուն Եգիպտոսի
մէջ ապրած Ս. Մակար Ալեքսանտրացիի յիշատակին: 1425-ին վանքը դարձած է հայ եկեղեցւոյ սեփականութիւնը
եւ հայերու համար ուխտատեղիի վերածուած է: Մեծ Եղեռնի տարիներուն վանքը, իբրեւ ապաստան
ծառայած է այդ աղէտէն վերապրողներուն համար: Մինչեւ 1974-ին թրքական բանակի Կիպրոս
ներխուժումը, վանքը հայերու համար այցելութեան լաւագոյն վայր հանդիսացած է, սակայն թրքական
ուժերու ներխուժումէն ետք վանքը աւերուած է, իսկ այսօր արդէն աղբանոցի վերածուած: 1974-ին
կիպրացի յոյներուն եւ թուրքերուն միջեւ տեղի ունեցած բախումներէն ետք, Թուրքիա գրաւեց
կղզիին մէկ երրորդը եւ հիւսիսային Կիպրոսի մէջ թրքական ինքնակոչ հանրապետութիւն մը ստեղծեց:
Թուրքիան, այդ ինքնակոչ հանրապետութիւնը ճանչցող՝ միակ պետութիւնն է: