Papa në audiencën e përgjithshme: Kisha në Afrikë, protagoniste e një stine të re
shprese.
Në audiencën e sotme të përgjithshme, mbajtur në Sallën e Palit VI, në Vatikan, Benedikti
XVI rikujtoi përmbledhtas etapat kryesore të shtegtimit të tij apostolik në Benin,
ku ishte nga 18 deri më 20 nëntor. Gëzimi e zelli apostolik i priftërinjve, rregulltarëve,
rregulltareve, seminaristëve e laikëve, që e pashë me sytë e mi – tha Papa - është
shenjë e sigurtë shprese për ardhmërinë e Kishës në Benin.
Për Benediktin XVI,
shtegtimi apostolik në Benin ishte përvojë prekëse feje, takim i ri me Jezu Krishtin
e gjallë. Në këtë fazë vendimtare për mbarë Kontinentin – tha Papa – Kisha në Afrikë,
me impenjimin e saj fisnik në shërbim të Ungjillit, mund të jetë protagoniste e një
stine të re shprese: “Në Afrikë pashë freski në pohimin e jetës, freski në
kuptimin fetar të shpresës, perceptim të realitetit në tërësinë e tij me Zotin, jo
me pozitivizmin, që në fund të fundit, shuan çdo shpresë. Gjithçka flet e thotë se
në këtë Kontinent ekziston një rezervë vigane jete e gjallërie për të ardhmen, në
të cilën ne mund të shpresojmë, Kisha mund të shpresojë shumë”. Një nga
çastet më të paharrueshme të shtegtimit apostolik, ishte lutja pranë varrit të burrit
të madh të Kishës, birit të shquar të Beninit e të mbarë Afrikës…: “…kardinalit
të paharrueshëm, Bernardin Gantin, kujtimi i pashlyeshëm i të cilit është më i gjallë
se kurrë në vendin, që e lindi, që e konsideron Atë të Atdheut, e edhe në mbarë Kontinetin”. Shtegtimi
në Benin tingëlloi si thirrje e fuqishme, drejtuar Afrikës, që të përpiqet me të gjitha
forcat për t’ua kumtuar Ungjillin mbarë afrikanëve, posaçërisht atyre, që nuk e njohin
ende, e njëkohësisht, si nxitje për bashkësitë e krishtera, në luftën për drejtësi,
paqe e pajtim: “Kjo frymë pajtimi është e domosdoshme, natyrisht,
edhe në planin civil; kërkon ringjalljen e shpresave edhe në jetën shoqërore, politike
dhe ekonomike të Kontinentit, siç e theksova në takimin me Institucionet politike,
Trupin Diplomatik dhe Përfaqësuesit e Feve”. Kujtojmë se në këtë takim,
Papa vuri theksin mbi shpresën, që duhet të frymëzojë udhën e Kontinentit, duke shprehur
dëshirën e tij të zjarrtë për liri e drejtësi e cila, muajt e fundit, po vlon më shumë
se kurrë në zemrat e afrikanëve: “Nënvizova, pastaj, se është e nevojshme
të ndërtohet një shoqëri, në të cilën lidhjet ndërmjet etnive të ndryshme të karakterizohen
nga dialogu e harmonia. I ftova afrikanët të hedhin farën e shpresës në të gjitha
realitetet, në të gjitha mjediset”. Të krishterët – shtoi Papa – janë njerëz
të shpresës, prandaj nuk mund të rrinë duarkryq përballë vuajtjeve të motrave e të
vëllezërve. E pikërisht këto fjalë qenë lajmotiv edhe në kremtimin eukaristik të së
dielës, në Stadiumin e Miqësisë, të Kotonusë: “Ishte një çast i jashtëzakonshëm
lutjeje, festë e fesë, në të cilën morën pjesë mijëra e mijëra besimtarë të Beninit
e të viseve të tjera afrikane, që nga pleqtë, tek fëmijët: dëshmi mahnitëse, që tregon
se feja mund t’i bashkojë të gjitha breznitë e t’u përgjigjet të gjitha sfidave, të
të gjitha stinëve të jetës”. Gjatë këtij kremtimi prekës, Ati i Shenjtë
u dorëzoi kryetarëve të Konferencave Ipeshkvnore të Afrikës, Nxitjen apostolike pas-sinodale
“Africæ munus”, tekst që përmban vijat themelore për rrugën e Kishës, domethënë, për
rrugën në të cilën do të ecin priftërinjtë, rregulltarët e rregulltaret, katekistët
dhe laikët në mbarë Kontinentin afrikan, në vitet e ardhshme: “Duke ua besuar
atyre frytet e Asamblesë II të Posaçme të Sinodit të Ipeshkvijve për Afrikën, u kërkova
t’i meditojnë me vëmendje të madhe e t’i jetojnë plotësisht, për t’iu përgjigjur si
duhet misionit të domosdoshëm ungjillëzues të Kishës shtegtare në Afrikën e mijëvjeçarit
të tretë”. Të gjithëve, Papa u bëri thirrje të jenë konstruktorë të palodhur
të bashkimit, të paqes e të solidaritetit: “Afrikanët iu përgjigjen
me entuziazëm ftesës së Papës i cili, në fytyrat e tyre, në fenë e tyre të zjarrtë,
në besimin plot bindje në Ungjillin e jetës, pa edhe një herë shenjat ngushëlluese
të shpresës për Kontinentin e madh afrikan”. Ati i Shenjtë shpjegoi, më
pas, se i preku me dorë këto shenja shprese edhe në takimin me fëmijët e me botën
e dhimbjes: “Në Kishën famullitare të Shën Ritës, shijova me të vërtetë gëzimin
e të jetuarit, harenë dhe entuziazmin e breznive të reja, që janë e ardhmja e Afrikës.
Aradheve festive të fëmijëve, një nga burimet dhe pasuritë më të mëdha të vendit,
u fola për figurën e Shën Kicitos, fëmijë ugandez, i mbytur sepse donte të jetonte
sipas mësimeve të Ungjillit. I nxita të gjithë t’ua dëshmojnë Jezusin bashkëmoshtarëve
të tyre”. Posaçërisht prekëse, vizita në Vatrën “paqe e gëzim”, drejtuar
nga misionaret e bamirësisë së Nënë Terezës: “Më bëri të jetoj një
çast emocioni të madh, duke takuar fëmijët e braktisur e të sëmurë, e më ndihmoi ta
shikoj konkretisht se dashuria e solidariteti dinë ta bëjnë të pranueshme, në ligështi,
forcën dhe dashurinë e Krishtit të ngjallur”. Çaste përplot me frymën e
bashkimit, edhe ato të kaluara me ipeshkvijtë e Beninit: “Ipeshkvijve
u drejtova ftesën të vënë në jetë nisma baritore, që të nxitin në familjet, në famullitë,
në bashkësitë e në lëvizjet kishtare, dëshirën për rizbulimin e vazhdueshëm të Shkrimit
Shenjt, parë si burim i përtëritjes shpirtërore dhe si rast për thellimin e mëtejshëm
të fesë”. Në përfundim të audiencës, Benedikti XVI i drejtoi përshëndetjen
e tij të përzemërt një grupi ciganësh, ardhur nga provinca hungareze e Tolnës, si
dhe delegacionit të Forumit katoliko-ortodoks. Anëtarët katolikë, posaçërisht – tha
Papa – i uroj përzemërisht me rastin e 40-vjetorit të Këshillit të Konferencave Ipeshkvnore
Evropiane. Në përfundim Papa nënvizoi se po jetojmë ditët e fundme të Vitit Liturgjik.
E kjo na kujton se vitet shkasin e shkojnë me shpejtësi e se rrjedha e pandalshme
e tyre mund edhe ta dëshpërojë njeriun, në se nuk e shikon kohën, që kalon pa kthim,
me syrin e fesë: “Të dashur të rinj, sintonizojeni hapin tuaj personal me
hapin e Kishës, duke ecur me ritmin e liturgjisë; përgatituni ta jetoni Kohën e Ardhjes
si kohë, gjatë së cilës prisni të vijë në shpirtin tuaj Mesia, Shëlbuesi ynë; të
dashur të sëmurë, lutjuni Zotit për dhuratën e shpresës, duke ofruar për të edhe vuajtjet
tuaja; e ju, të dashur bashkëshortë të rinj, kini gjithnjë besim
në Provaninë hyjnore, që u prin e i shoqëron familjet e krishtera”.