Каля 16.00 Святы Айцец
прыбыў у міжнародны аэрапорт “Кардынал Ганцін” у Катану, дзе адбылася цэрымонія развітання.
Бэнэдыкт ХVI звярнуўся да прысутных прадстаўнікоў уладаў, касцёльных іерархаў і вернікаў
з прамовай.
“Маё Апостальскае падарожжа на афрыканскую зямлю падыходзіць да
свайго канца. Я ўдзячны Богу за гэтыя дні, якія правёў з вамі ў радасці дзякуючы вашай
гасціннасці. Дзякую Вам, спадар Прэзідэнт, за сардэчныя словы і за вашыя шматлікія
намаганні, каб маё прыбыванне ў вашай краіне было прыемным. Дзякую таксама прадстаўнікам
розных органаў улады краіны і ўсім валанцёрам за ваш шчодры уклад у поспех гэтага
падарожжа. Я не забуду ніколі жыхароў Беніна, які прыняў мяне з цяплынёй і энтузіязмам.
Мая ўдзячнасць скіроўваецца таксама да членаў Каталіцкага Касцёла, да шматлікіх старшыняў
нацыянальных і рэгіянальных Біскупскіх Канферэнцый, якія прыбылі сюды. Канешне, асаблівым
чынам дзякую біскупам Беніна.
Я хацеў зноў наведаць афрыканскі кантынент,
да якога маю асаблівую павагу і прыхільнасць, бо перакананы, што гэта зямля надзеі.
Аб гэтым я казаў шмат разоў. Сапраўдныя каштоўнасці, якія з’ўляюцца прыкладам для
ўсяго свету, знаходзяцца тут і квітнеюць з дапамогай Бога і рашучасцю жыхароў Афрыкі.
Паслясінадальная Апостальская адгартацыя “Africae munus” можа вам эфектыўна дапамагаць,
бо яна адкрывае перспектывы і цікавыя пастырскія ініцыятывы. Я рэкамендую ўсім вернікам
Афрыкі вывучаць яе з увагай і ажыццяўляць у штодзённым жыцці. Кардынал Ганцін, выдатны
сын Беніна, веліч якога прызнана да такой ступені, што гэты аэрапорт носіць яго імя,
прымаў удзел разам са мной у шматлікіх Сінодах і зрабіў у іх істотны і каштоўны уклад.
Няхай ён суправаджае ажыццяўленне ў практыцы гэтага дакумента.
Падчас майго
падарожжа я змог сустрэцца са шматлікімі прадстаўнікамі грамадскага жыцця Беніна і
з членамі Каталіцкага Касцёла. Гэтыя сустрэчы, такія розныя па сваёй прыродзе, сведчацаць
аб магчымасці гарманічнага суіснавання ў межах краіны паміж Касцёлам і дзяржавай.
Добрая воля і ўзаемная павага не толькі дапамагаюць у дыялогу, але з’яўляюцца неабходнымі
ў пабудове адзінства сярод людзьмі, этнічнымі групамі і народамі. Слова “братэрства”
з’яўляецца адным з трох словаў вашага нацыянальнага дэвіза. Жыць па-братэрску, нягледзячы
на адрозненні, не з’яўляецца ўтопіяй. Чаму адна з афрыканскіх краін не магла б указаць
ўсяму свету шлях да сапраўднага, справядлівага братэрства, заснаванага на сям’і і
роўным доступе да працы? Жыхары Афрыкі могуць годна жыць у міры і справядлівасці!
Гэта пажаданне, перш чым пакіну Бенін і афрыканскі кантынент, я выказваю з вялікай
упэўненасцю і надзеяй
Спадар Прэзідэнт, я яшчэ раз дзякую вам за прыём, а
таксама ўсім вашым суайчыннікам, біскупам Беніна і ўсім вернікам краіны. Хачу заклікаць
увесь афрыканскі кантынент быць заўсёды “соллю зямлі і святлом свету”. Праз заступніцтва
Маці Божай Афрыкі, няхай Бог усіх вас бласгаславіць.
Затым Папа падняўся на
борт самалёта і накіраваўся ў Рым. Чакаецца што Пантыфік прыбудзе ў Вечны Горад каля
22.00 па рымскаму часу.