22 лістапада ў Ватыкане
прайшла прэс-канферэнцыя прысвечаная маючай адбыцца 24-26 лістапада Міжнароднай канферэнцыі
“Пастырства медыцынскіх работнікаў і служэнне жыццю ў святле навучання бл. Яна Паўла
ІІ”, арганізатарам якой з’яўляецца Папская рада пастрыства работнікаў сферы аховы
здароўя.
Старшыня гэтай ватыканскай дыкастэрыі, арцыбіскуп Зыгмунт Зімоўскі,
адзначыў, што значны ўклад у развіццё пастырства медыкаў зрабіў менавіта папа Ян Павел
ІІ, які заснаваў спецыяльную Раду, устанавіў дату святкавання Міжнароднага дня хворага
і быў ініцыятарам стварэння фонда “Добры Самаранін”. Акрамя таго, арцыбіскуп Зімоўскі,
падкрэсліў, што Ян Павел ІІ меў асаблівую ўвагу да хворых і людзей, якія аб іх клапоцяцца.
Падчас
канферэнцыі ўдзельнікі пазнаёмяцца з дакладамі, сведчаннямі і падзеляцца тэалагічна-пастырскім
вопытам, натхнёным навучаннем благаслаўлёнага Папы. У форуме прымуць удзел шматлікія
каталіцкія іерархі, а таксама прадстаўнікі іншых канфесій і рэлігій. Біскуп Уладзіслаў
Блін будзе прадстаўляць на мерапрыемстве Беларусь. Акрамя таго, ўдзел у канферэнцыі
прымуць члены арганізацый і фондаў, занятых у справе аховы здароўя, а таксама сем’і,
валанцёры, прадстаўнікі бальніц і манаскіх супольнасцяў.