Veprimtari festive me rastin e 28 nëntorit në Romë.
Në Romë e në botë, kudo jetojnë e punojnë emigrantë shqiptarë, ndjehet fort atmosfera
e 28-nëntorit, festës kombëtare të Shqipërisë. Në Romë sipas traditës, festimeve i
paraprin Bashkësia arbëreshe, që organizon dy takime: një kulturor e një shpirtëror. Në
takimin e parë, organizuar nga Kolegji Papnor grek dhe Bashkësia bizantine e Shën
Athanasit në Romë, të shtunën, më 26 nëntor, në orën 17.00, si zakonisht në
Via dei Greci 45, do të paraqitet materiali ndihmës katekistik, përgatitur nga i ndjeri
monsinjor Eleuterio Fortino, titulluar “Koncilet Ekumenike dhe dëshmimi i fesë së
krishterë”, vepër postume. Arkimandriti profesor Manuel Nin, do të mbajë referatin:
“Shtatë Koncilet e para Ekumenike në liturgjinë bizantine”, ndërsa diakoni, profesor
Luigi Fioriti “Shtatë Koncilet Ekumenike në ekleziologjinë bizantine” Takimin do
ta drejtojë profesor Domenico Morelli. Pastaj, sipas traditës, të dielën, më
27 nëntor, në orën 10. 30 në Kishën e Shën Athanasit, via del Babuino, 149, do
të kremtohet Liturgjia hyjnore në gjuhën shqipe, kryesuar nga Arkimandriti, Antonio
Paratore.Si çdo vit, besimtarët e pranishëm do të luten për të gjithë shqiptarët,
që jetojnë në Shqipëri, në Kosovë, në Maqedoni, në Mal të Zi e në diasporën e vjetër
e të re.