Սիրելի եւ պատուական հաւատացեալներ ի սփիւռս աշխարհի: Այսօր, մեր հայ ծիսական տօնացոյցին
համաձայն ս. ծննդեան Տեառն մերոյ Յիսուսի Քրիստոսի Յիսնակացի պահեցողութեան շրջանին նախօրեակն
է, զոր կը կոչենք բարեկենդան, կամ բարիկենդան, որ կը նշանակէ ուրախութիւն, խրախճանք:
Պահեցողութիւնը, ինչպէս կ’ըսեն մեր հայրերը կը մաքրէ հոգին, կը բարձրացնէ եւ կ’ազնուացնէ
միտքը, կը մեղմացնէ կիրքերը եւ ցանկութիւնները եւ Աստուծոյ լոյսը կը սփռէ մեր հոգիներուն
մէջ: Այս ընթացքը օրհնաբեր դարձնելու համար, եկեղեցին կը թելադրէ մեզի պարզ եւ շատ
գեղեցիկ աղօթք մը` Տէրունական աղօթքը, որուն հեղինակը նոյնինքն մեր Տէրն է՝ Յիսուս Քրիստոս:
Տէրունական աղօթքը, մեր քրսիստոնէական հաւատքին ու սկզբունքներուն ամփոփ պարունակութիւնն
է, մէկ խօսքով՝«համառօտ աւետարան»: Սոյն աղօթքը կ’արտայայտէ ակնածանք, խոնարհութիւն,
յոյս, հաւատք, սէր, միութիւն եւ զղջում: Յիսուս մեզի այս աղօթքը սորվեցուց որպէսզի
Աստուծոյ հետ անդադար խօսինք, անդադար փառաբանենք զինք, ոչ միայն որպէս արարիչ աշխարհի,
այլ որպէս հայր՝ հայր գթած, հայր բարեխնամող, հայր սիրոյ եւ ողորմութեան: Մեր հօր Աստուծոյ
անունը մեզի համոզում կը ներշնջէ, լաւատեսութիւն եւ նախախնամութիւն: Երկնքի մէջ հայր
մը ունինք որ մեր բոլոր կարիքները գիտէ. իր իմաստութեամբ ու նախախնամութեամբ գիտէ ինչ
որ բարի է մեզի եւ ինչ որ վատ է: Յիսուս աւետարանին մէջ կ’ըսէ.« խնդրեցէք նախ Աստուծոյ
արքայութիւնը եւ անոր արդարութիւնը, եւ այդ ամէնը աւելիով կը տրուի ձեզի» (մտ. 6, 33): Երբ
Աստուծոյ «Հայր» կ’անուանենք, պարտաւոր ենք ըլլալու անոր հարազատ որդիները՝ բարութեան
եւ սրբութեան, եւ ոչ թէ չարութեան եւ սատանայի որդիներ: Երբ կ’ըսենք. «Քու կամքդ թող
ըլլայ, ինչպէս երկնքի մէջ նաեւ երկրի վրայ» այս կը նշանակէ որ կատարելապէս հնազանդ պիտի
ըլլանք Աստուծոյ եւ մեր կամքը պիտի համակերպի անոր կամքին: Ի՞նչ է ուրեմն Աստուծոյ
կամքը: Աստուծոյ կամքը՝ մեղքի եւ չարութեան բռնութեան տակ ընկճուած հոգիներու փրկութիւնն
է: Աստուծոյ կամքը՝ կորսուած ոչխարներուն դարձն է դէպի հայրենական տունը: Աստուծոյ
կամքը՝ աշխարհի խաղաղութիւնն է, պատերազմներու դադարումն է: Աստուծոյ կամքը՝ եղբայրսիրութիւնն
է, մարդոց միջեւ հաշտութիւնն է, ներողամտութիւնն է (մեր պարտապաններուն մեղքերը ներենք,
որպէսզի Աստուած մեզի ներէ մեր յանձանքները): Աստուծոյ կամքը եկեղեցիներուն միութիւնն
է. «թող մէկ ըլլան ինչպէս ես եւ դուն մէկ ենք» կ’ըսէ Յիսուս: Ի վերջոյ Աստուծոյ կամքը՝
մարդուն գերագոյն բարիքն է, սէրն է: Աստուած այնքան կը սիրէ մեզ, որ մեզի ազատութիւն
կու տայ ապրելու իր հովանիին ներքեւ: Ան միշտ իր կամքը ցոյց կու տայ մեզի, որպէսզի ազատ
կամքով համակերպինք իր կեանքին: Աստուած պէտք չունի մեզի, որովհետեւ կատարեալ է, իր անունը
սուրբ է. մենք պէտք ունինք իրեն: Պէտք ունինք իր սիրոյն եւ ողորմութեան: Առանձին ամենեւին
չենք կրնար ազատիլ մեղքի կապանքներէն: Հօր Աստուծոյ նախախնամութեամբ է միայն որ կրնանք
մարդկային խեղճ սահմաններէն դուրս գալ, մահուընէ դէպի կեանք գալ, դէպի սրբութիւն, դէպի
յաւիտենական կեանք: ամէն: