Emri i Kardinalit ka kuptimin lis (gan) i hekurt (tin) i trojeve afrikane. Bir i një
nëpunësi hekurudhash, mësimet e para i kreu në shkollat e Dahomey (Sot Republika
e Beninit). Hyri në seminarin e vendit në Ouidah (1936), për t’u shuguruar në Lomé
të Togos nga Kryeipeshkvi i Kotonusë, imzot Lui Parizò (1951). Për tre vjet qe mësues
i gjuhëve pranë seminarit dioqezan, ku njëkohësisht iu kushtua veprimtarive baritore
në një grup fshatrash. Më 1953 u transferua në Romë, ku u diplomua në teologji, pranë
Universitetit Urbanian dhe në drejtësi kanonike, pranë Universitetit Lateranens. Ndihmës
i kryiepshkvit të Kotonusë më 1956, u shugurua ipeshkëv në Romë më 1957. U emërua
kryeipeshkëv i Kotonusë nga Gjoni XXIII, duke zënë vendin e mësuesit të tij të dashur,
kryeipeshkvit Parizò. Nisi një veprimtarui të dendur baritore, në fusha nga më të
ndryshmet, për të ndjekur nga afër situatat, institucionet, shkollat, veprimtaritë
e katekistëve e të rregulltareve vendase, duke i kushtuar vëmendje të posaçme thirrjeve
për jetën meshtarake, si Kryetar i Konferencës Ipeshkvnore zonale (Dahomey, Togo,
Bregu i Fildishtë, Volta e Epërme, Guinea e Re, Senegali e Nigeria). Dha dorëheqjen
nga drejtimi i Kryeidoqezës së Kotonusë, pasi u thirr në Romë nga Papa Pali VI, që
e emëroi ndihmës-sekretar të Kongregatës për Ungjillëzimin e Popujve (1971), e, dy
vjet më pas, edhe sekretar. Qe zëvendës-kryetar i Komisionit “Iustitia et Pax”
(1975), pro-kryetar (1976), e më pas edhe kryetar (1977). Gjithnjë në vitin 1975,
Pali VI e emëroi edhe zevendës –kryetar të Këshillit Papnor “Cor Unum” e më pas e
krijoi kardinal, në Koncistorin e e 27 qershorit 1977. Papa Gjon Pali II e emëroi
kryetar të “Cor Unum” (4 shtator 1978) e më pas, Prefekt të Kongregatës për Ipeshkvijtë
dhe Kryetar të Komisionit Papnor për Amerikën Latine (8 prill 1984), detyra që i kreu
për 14 vjet me radhë, deri më 25 qershor 1998. Mori pjesë në Koncilin II të Vatikanit,
si ipeshkëv (1962-65) dhe në një mori sinodesh të ipeshkvijve. Ishte anëtar i Akademisë
Mbretërore të Marokut; anëtar i grupit shoqërues të Gjon Palit II në vend (1985) dhe
Oficer Madhor i Legjonit Francez të Nderit. Qe Dekan i Kolegjit Kardinalor nga
5 qershori 1993 deri më 30 nëntor 2002, kur Gjon Pali II pranoi kërkesën e tij për
dorëheqje, për t’u rikthyer në atdhe, pas më se 30 vjetësh të kaluara në Romë, si
i pari kardinal afrikan në krye të një dikasteri të Kuries Romake.Kardinali Gantin
vdiq në Paris, më 13 maj 2008. U salikua në Kotonu, në praninë e të dërguarit të Papës,
kardinalit Giovanni Battista Re dhe të një morie njerëzish, duke nisur nga personalitetet
e të gjitha fushave, për të përfunduar tek njerëzit më të thjeshtë të Afrikës. Sipas
dëshirës së tij, pushon në paqe në Kapelën e Seminarit të Madh të Oudiah, pranë atit
e mësuesit të vet, imzot Lui Parizò. Emrin e tij e mbajnë aeroporti ndërkombëtar,
disa rrugë e shumë nisma. Më 13 maj 2009 u krijua Çmimi Ndërkombtar ‘Kardinali Bernardin
Gantin”.