Me 757.356 banorë, është qyteti më i populluar i Beninit dhe kryeqytet ekonomik. Shtrihet
në gjirin e Guinesë, mbi të ashtuquajturin “Bregu i skllevërve”, i famshëm gjatë kohëve
koloniale për tregtinë e skllevërve. Lindi në pjesën e jashtme të njërës nga lagunat
më të gjera, laguna e Nokouesé, me sipërfaqe prej 120 kilometrash gjatë bregdetit
beninez. Një kanal, me dy ura, e ndan kordonin mbrojtës të tokës dhe e lidh lagunën
me oqeanin i cili, gjatë baticës, hyn në të, duke e kripur ujin. 30 kilometra në veri-lindje,
mbi bregun tjetër të së njëjtës lagunë, shtrihet Porto Nuovo, kryeqyteti administrativ
i vendit. Në Kotonu gjinden Pallati Presidencial, pjesa më e madhe e shërbimeve
qeveritare, selitë diplomatike, porti kryesor i Beninit dhe aeroporti ndërkombëtar,
kushtuar birit të shquar të vendit, kardinalit Bernardin Gantin. Në zanafillë Kotonu
ishte fshat i vogël, ndërtuar nga holandezët dhe anglezët, për të strehuar karvanet
e skllevërve, që i sillnin mbretërit e Alladës nga brendia e vendit. Kur tregtia e
skllevërve u deklarua e paligjshme, në vitin 1830, mbreti i Dahomey, Guezo, ngriti
një paraport klandestin, të quajtur “Ku Tonu”(Delta e lumit të vdekjes), duke ringjallur
traditën, sipas së cilës shpirtrat e të vdekurve zbresin përgjatë rrjedhës së lumit,
deri në det. Në vitin 1878 këtu u vendosën shoqëritë e mëdha tregtare, ndërsa më 1981,
në bregdet u ngrit skela e parë. Porti është plot gjallëri. Eksportohen kikirikë,
kopër, pambuk, farë dhe vaj palme. Ka shkëmbime tregtare me Nigerin e me një pjesë
të Nigerisë. Është qendër e industrive ushqimore (punishte vaji e birre) dhe bazë
e peshkimit industrial. Po këtu prodhohen tekstile e çimento, montohen automobilë
e biçikleta, eksportohen prodhime të naftës, boksite e hekur. Shumë e përhapur, feja
Vudù, e njohur zyrtarisht në vend dhe e përhapur në të gjithë Afrikën Perëndimore
si dhe në Amerikën Latine (60 milionë ndjekës në mbarë botën). Lagjet rezidenciale
dhe ato administrative ndodhen rrëzë plazheve. Rrugët janë plot me moto-taksi origjinale,
“zémigiàn”, që në gjuhën vendase do të thotë: “merrmë e shpjermë atje”e që dallohen
nga larg, për shkak të xhaketës së verdhë të motoçiklistit. Një tjetër pikë tërheqëse
e qytetit, është tregu i famshëm i Dantokpa, më i madhi nën qiell të hapur në të gjithë
Afrikën Perëndimore.