Konferenca e shtypit e Papës Benedikti XVI me gazetarët në avionin për në Benin: politikanët
afrikanë të kapërcejnë egoizmin
Gjatë udhës me avion për në Benin, Ati i Shenjtë u takua me rreth 50 gazetarët, që
e shoqëronin, të cilët, përmes zëdhënësit të Vatikanit, atë Federiko Lombardi, i bënë
pyetje të ndryshme. E para, nuk mund të mos kishte të bënte me vendimin për të shkuar
pikërisht në Benin e jo në një vend tjetër të Afrikës, pavarësisht se mesazhi i Benediktit
XVI është për të gjithë kontinentin. Kujtojmë se në Kotonu, Papa ndiqet edhe nga rreth
njëmijë gazetarë të tjerë. Por të dëgjojmë përgjigjen e parë të tij, mbi arsyet e
udhëtimit në Benin: Arsyet janë
të ndryshme. E para është se Benini është vend në paqe: paqe e jashtme dhe e brendshme.
Institucionet demokratike funksionojnë, janë ndërtuar me frymën e lirisë e të përgjegjësisë,
prandaj drejtësia dhe puna për të mirën e përbashkët mundësohen e garantohen nga sistemi
demokratik e nga ndjenja e përgjegjësisë, në liri. Arsyeja e dytë është se, ashtu
si në shumicën e vendeve afrikane, ekzistojnë fe të ndryshme, që bashkëjetojnë paqësisht.
Kemi të krishterët me konfesione të ndryshme, kemi myslimanët e fetë tradicionale,
që bashkëjetojnë duke e respektuar njëra-tjetrën e duke marrë bashkarisht përsipër
përgjegjësinë për paqen e për pajtimin. Më duket se kjo bashkëjetesë ndërmjet feve
dhe dialogu fetar, si faktor paqeje dhe lirie, është një aspekt i rëndësishëm edhe
i Nxitjes Apostolike post-sinodale. Së fundi, arsyeja e tretë është se ky vend është
vendlindja e një mikut tim të dashur, kardinalit Bernardin Gantin: kam pasur gjithnjë
dëshirë, që një ditë, të lutem në varrin e tij. Për mua ka qenë vërtet një mik i madh,
prandaj dëshira për të parë vendin e kardinalit Gantin, përfaqësues i shquar i Afrikës
katolike, i Afrikës njerëzore e të qytetëruar, ka qenë për mua një nga motivet, që
më shtynë ta vizitoj këtë vend. Ndërsa afrikanët shohin se bashkësitë
e tyre tradicionale po dobësohen gjithnjë e më shumë, Kisha Katolike vihet përballë
suksesit në rritje të Kishave ungjillore, apo pentekostale, nganjëherë të krijuara
në Afrikë, që propozojnë një fe tërheqëse, një mesazh të thjeshtuar të krishterë:
ngulin këmbë në shërimet e mrekullueshme, përziejnë kultin e tyre me atë tradicional…
Cili është qëndrimi i Kishës Katolike ndaj këtyre bashkësive, shpesh agresive? E si
mund të jetë më tërheqëse se këto bashkësi, që paraqiten si festive, të ngrohta e
të ndërthurura me kulturën e vendit? Këto bashkësi janë fenomen botëror, në
të gjitha kontinentet, sidomos janë shumë të pranishme në Amerikën Latine dhe në Afrikë.
Në përgjithësi, karakterizohen nga elemente si institucionaliteti i paktë, pra, pak
institucione, arsim pa ndonjë peshë të rëndë, mesazh i thjeshtë, i lehtë dhe i kuptueshëm,
në dukje konkret e, pastaj – siç thatë edhe ju – pjesëmarrje në liturgji me ndjenjat,
kulturën e secilit, duke lejuar kombinimet ndërmjet feve. Nga njëra anë, kjo garanton
sukses, por nuk siguron qëndrueshmëri. Dimë se shumë prej besimtarëve kthehen në Kishën
Katolike, ose shkojnë nga një bashkësi tek tjetra. Prandaj, nuk duhet t’i imitojmë
këto bashkësi, por të pyesim veten se ç’mund të bëjmë ne për t’i dhënë gjallëri të
re fesë katolike. E, do të thosha, se pikësëpari, nevojitet, sigurisht, një mesazh
i thjeshtë, i thellë, i kuptueshëm; është e rëndësishme që krishterimi të mos duket
si një sistem i vështirë, evropian, që dikush tjetër nuk mund ta kuptojë e ta realizojë,
por si një mesazh universal, që na thotë se Zoti ekziston, se ndërhyn, se na njeh
e na do e se feja konkrete shkakton bashkëpunim e vëllazërim. Prandaj, një mesazh
i thjeshtë e konkret është shumë i rëndësishëm. Pastaj, edhe institucioni nuk duhet
të jetë shtypës, duhet të mbizotërojë iniciativa e bashkësisë dhe e personit. E, së
fundi, do të thosha se është e rëndësishme edhe pjesëmarrja në liturgji, por jo në
mënyrë sentimentale: ajo nuk duhet bazuar vetëm në shprehjen e ndjenjave, por duhet
karakterizuar nga prania e misterit në të cilin hyjmë, të cilit i lejojmë të na formojë.
Gjithashtu, në procesin e inkulturimit nuk duhet humbur universaliteti i Kishës. Unë
preferoj të flas për ndërkulturë, jo aq për inkulturim, pra, për një takim ndërmjet
kulturave, duke pasur parasysh të vërtetën e përbashkët të të gjithë njerëzve të kohës
sonë, vëllazërimin universal e, duke mos e humbur këtë pasuri kaq të madhe, që na
mëson katolicizmi: në të gjitha anët e botës jemi vëllezër, jemi një familje, që njihet
e bashkëpunon me frymën e vëllazërimit. Shenjtëri, gjatë dhjetëvjeçarëve
të fundit, në tokën afrikane, kemi pasur shumë operacione paqeruajtëse, konferenca
për rindërtimin, komisione për të vërtetën dhe pajtimin, me rezultate, herë të mira
e herë zhgënjyese. Gjatë asamblesë sinodale, ipeshkvijtë kritikuan ashpër politikanët,
si përgjegjës për problemet e kontinentit. Cili është mesazhi që keni për politikanët
e Afrikës e cili është kontributi i veçantë, që mund të japë Kisha, në arritjen e
paqes së qëndrueshme në kontinent? Mesazhi gjendet në tekstin, që do t’i dorëzoj
Kishës në Afrikë: nuk mund ta përmbledh tani, me pak fjalë. Është e vërtetë se ka
pasur shumë konferenca ndërkombëtare për Afrikën, për vëllazërimin universal. Thuhen
gjëra të bukura e nganjëherë, edhe bëhen, duhet ta pranojmë. Por sigurisht, fjalët,
dëshira e vullneti janë më të mëdha se realizimi i tyre e duhet ta pyesim veten pse
realiteti nuk i arrin fjalët dhe qëllimet. Më duket se faktor themelor për këtë është
se ky rinovim, ky vëllazërim universal kërkon të heqësh dorë nga diçka, të shkosh
përtej egoizmit, të punosh për tjetrin. E kjo është e lehtë të thuhet, por është vështirë
të realizohet. Njeriu, ashtu siç është pas mëkatit të rrjedhshëm, dëshiron ta rifitojë
vetveten, ta ruajë dhe jo ta dhurojë jetën. Por me këtë mendësi, sipas së cilës nuk
duam të japim, por vetëm të marrim, natyrisht nuk mund të arrihen synimet e mëdha.
Vetëm me dashuri e pas njohjes së Zotit, që na do, që na jep, mund të arrijmë deri
në atë pikë, sa të guxojmë ta japim jetën, ta dhurojmë atë, sepse e dimë, se duke
bërë kështu, fitojmë. Shenjtëri, në hapjen e Sinodit Afrikan në Romë,
e quajtët Afrikën “mushkërinë shpirtërore të njerëzimit në krizë feje e shprese”.
Duke pasur parasysh problemet e kontinentit, kjo frazë të çudit. Në ç’kuptim mendoni
se nga Afrika mund të vijë vërtet fe e shpresë për botën? A mund të kontribuojë Afrika
edhe në ungjillëzimin e krejt planetit? Natyrisht, Afrika ka probleme e vështirësi
të mëdha, i gjithë njerëzimi ka probleme… Nëse mendoj për rininë time, ishte një botë
kaq e ndryshme nga kjo e sotmja sa, nganjëherë, më duket se jetoj në një planet tjetër.
Njerëzimi ka hyrë në një proces gjithnjë e më të përshpejtuar shndërrimesh. Gjatë
50 vjetëve të fundit, duke filluar nga pavarësia, pas kolonializmit, deri në ditët
tona, për Afrikën, ky proces është bërë shumë kërkues, shumë i vështirë, me probleme
të mëdha, që nuk janë kapërcyer akoma. Megjithatë, kjo freski jete në Afrikë, kjo
rini plot entuziazëm dhe shpresë, por edhe plot humor e alegri, na tregon se këtu
kemi një rezervë njerëzore, kemi freski për fenë dhe shpresën; këtu perceptohet realiteti
metafizik, realiteti në tërësinë e vet, së bashku me Zotin e nuk ekziston reduktimi
në pozitivizëm, që e kufizon jetën tonë, e bën të thatë dhe shuan çdo shpresë. Pra,
humanizmi i freskët, që e ka vendin në shpirtin rinor të Afrikës, pavarësisht nga
problemet, që kanë qenë e do të jenë, tregon se këtu kemi akoma një rezervë jete
dhe gjallërie për të ardhmen, mbi të cilën mund të mbështetemi. Pyetja
e fundit, Shenjtëri. Të kthehemi për një çast tek arsyet e këtij udhëtimi për në Benin.
Ju thatë se figura e kujtimi i kardinalit Gantin është një nga motivet e rëndësishme
të vizitës. E keni njohur mirë, ka qenë paraardhësi juaj si Dekan i Kolegjit Kardinalor
dhe të gjithë e vlerësojnë. A mund të na jepni një dëshmi personale për të? E
kam parë për herë të parë kardinalin Gantin, gjatë shugurimit tim si kryeipeshkëv
i Munihut në vitin 1977. Erdhi, sepse njëri nga nxënësit e tij ishte dishepull i imi:
kështu, idealisht, ekzistonte ndërmjet nesh një miqësi në fasha, megjithëse akoma
s’ishim parë. Në atë ditë të rëndësishme për mua, m’u bë qejfi kur takova këtë ipeshkëv
të ri afrikan, plot fe, gëzim e guxim. Më vonë, kemi bashkëpunuar shumë, sidomos kur
ai ishte prefekt i Kongregatës për Ipeshkvijtë dhe pastaj dekan i Kolegjit kardinalor…
E kam admiruar gjithnjë inteligjencën e tij praktike e të thellë, aftësinë për të
mos rënë në frazeologji të kota, por për të kuptuar se ç’ishte thelbësore e ç’ishte
pa rëndësi. E pastaj, humorizmi i tij vërtet argëtues… Ishte sidomos njeri me fe të
thellë e lutej shumë. Kjo e ka bërë kardinalin Gantin jo vetëm mik për mua, por edhe
shembull për t’u ndjekur. Ishte një ipeshkëv i madh afrikan katolik. Jam vërtet i
lumtur, që tani mund të lutem në varrin e tij e ta ndjej afërsinë e fenë e tij të
madhe, që e bën gjithnjë mik e shembull për mua.