Kardinal Ravasi: Shqipëria vend me energji të reja njerëzore e kulturore, por ka ende
ide nga ideologjitë e së kaluarës.
Në Tiranë përfunduan takimet e “Oborrit të jobesimtarëve”, nismë e Këshillit Papnor
për Kulturën, që presidenti i saj kardinali Granfranco Ravasi deshi ta çonte edhe
në Shqipëri për të dialoguar me botën e kulturës. E për dy ditë me radhë biblisti
e teologu Ravasi takoi e dëgjoi intelektualët, akademikët si dhe të rinjtë shqiptarë,
besimtarë të feve të ndryshme por edhe jo besimtarë mbi përmasën shpirtërore, mbi
Zotin dhe rolin e fesë në jetën e njeriut e kontributin e saj në shoqëri. Kardinali
Ravasi dëgjoi më vëmendje opinionet dhe idetë e shkollave të ndryshme të mendimit
që qarkullojnë nëpër institucionet universitare e më gjerë në Shqipëri e pastaj shpalosi
mendimin e Kishës katolike mbi çështjet themelore të ekzistencës njerëzore. Kardinali
Ravasi u largua nga Shqipëria me përshtypje pozitive për gjallërinë dhe freskinë që
treguan të rinjtë intelektualë e jo, dhe i habitur se si ende sot në shoqërinë shqiptare
ekzistojnë ide të stërvjetruara nga ideologjitë dhe rrymat e indoktrinuara nga e kaluara
që qarkullojnë e propagandohen. Gjithsesi kardinali Ravasi nënvizoi elementin
pozitive që shqiptarët e ruajnë dhe kultivojnë: bashkëjetesën ndërfetare njëri me
tjetrin, respektin për simbolet e shenjta të të gjitha bashkësive fetare. Ky fakt
është nxitje për të gjithë për të vijuar në kultivimin e vlerave që burojnë nga besimi
në Zotin dhe për të dialoguar me kulturën bashkëkohore, dy elemente këto që ndihmojnë
në ndërtimin e indit të ri e pozitiv shoqëror. Po mbi takimet e fundit që kardinali
Ravasi pat në universitetet e Tiranës të dëgjojmë shërbimin e Klaudia Bumçit........