14-16 лістапада ў
Балціморы праходзіць пасяджэнне Канферэнцыі Біскупаў ЗША, якое ўпершыню ўзначальвае
новы старшыня епіскапата арцыбіскуп Нью-Ёрка Цімаці Долан. Чакаецца, што ўдзел у сустрэчы
прыме таксама новы Апостальскі нунцый у краіне арцыбіскуп Карло Марыя Вігано.
Іерархі
паразважаюць аб стане Каталіцкага Касцёла ў ЗША і выкліках, на якія трэба знайсці
адказы ў будучыні. Біскупы правядуць галасаванне адносна прапановы аб змене складу
працоўнай групы па пытаннях медыцынскай дапамогі пры спецыяльнай камісіі створанай
пры епіскапаце і абмяркуюць праблемы звязаныя з парушэннямі рэлігійнай свабоды. Акрамя
таго, амерыканскія біскупы правядуць галасаванне адносна новага дакумента, якім будзе
рэгуліравацца збор ахвяраванняў у дыяцэзіях.
Члены епіскапата абмяркуюць таксама
пытанне ўключэння ў літургічны каляндар успамінаў бл. Марыяны Коўп і бл. Яна Паўла
ІІ, пазнаёмяцца са справаздачай Камісіі па справах свецкіх, сужэнства і сям’і, праслухаюць
даклад кардынала Даніэля дэ Нардо, аб новай ініцыятыве пад назвай “Праект Рахель”,
які ўключае ў сябе псіхалагічную, пастырскую і медыцынскую дапамогу жанчынам, што
здзейснілі аборт. Кардынал Дональд Вурл прачытае даклад аб Апостальскай Канстытуцыі
Бэнэдыкта XVI “Anglicanorum coetibus” – адказе Святога Пасаду групе англікан, якія
пажадалі вярнуцца да поўнага адзінства з Каталіцкім Касцёлам.
Амерыканскія
біскупы правядуць выбары новага сакратара епіскапата і старшынь камісій.