В’етнам: ватыканcкая жандармерыя на асамблеі Інтэрпола
На 80-й Генеральнай
Асамблеі Інтэрпола ў В'етнаме прысутнічала афіцыйная дэлегацыя з Ватыкана, якую прадстаўляла
яго жандармерыя. Сярод паліцэйскіх і супрацоўнікаў службаў бяспекі са 189 краін прысутнічалі
камендант Даменік Джані і тры іншыя супрацоўнікі ватыканскай жандармерыі. На сустрэчы
абмяркоўваліся пытанні барацьбы з тэрарызмам, піша “L'Osservatore Romano”.
Форум
у Ханоі пачаўся 31 кастрычніка пад лозунгам “Разам за бяспечны свет”. Удзельнікі абмеркавалі
тэмы нацыянальнага і міжнароднага тэрарызму, арганізаванай злачыннасці, марскога пірацтва,
гандлю людзьмі і кіберзлачыннасці.
Прадстаўнікі Ватыкана, як паведамляе “Osservatore”,
займалі месца ў канферэнц-зале побач з дэлегацыяй Сацыялістычнай Рэспублікі В'етнам;
паміж двума бакамі існавала “цёплая атмасфера” працы. У рамках канферэнцыі адбылося
таксама некалькі двухбаковых сустрэч. Ватыканская дэлегацыя правяла размовы з калегамі
з Беніна і іншых краін Заходняй Афрыкі з улікам маючага адбыцца на гэтым тыдні візіту
Папы ў Катану.
Акрамя таго, прайшла сустрэча з дэлегацыяй з Бразіліі, куды
ў 2013 г. накіруецца Папа для ўдзелу ў Рыа-дэ-Жанейра ў Сусветных днях моладзі. Ватыканскія
жандармы наведалі таксама арцыбіскупа Ханоя П’ера Нгуена Ван Нхона, і прынялі ўдзел
у св. Імшы ў катэдры св. Юзэфа. Наступная канферэнцыя Інтэрпола пройдзе ў 2012 г.
у Італіі.