Спецыяльна да Апостальскага
візіту Бэнэдыкта XVI у Бенін, які пройдзе 18-20 лістапада, быў падрыхтаваны Імшал,
у якім змешчаны літургічныя тэксты і апісанне асноўных момантаў падарожжа Папы ў гэту
афрыканскую краіну. Імшал пачынаецца словамі, якія ўказваюць на адну з мэтаў візіту
Пантыфіка: “Благаслаўлёны той, хто ў імя Пана, нясе добрую навіну прымірэння, справядлівасці
і міру для ўсёй Афрыкі”. “Свет патрабуе прымірэння, справядлівасці і міра, але наш
афрыканскі кантынент, мае асабліва вялікую патрэбу у гэтым, і Папа прыбудзе, каб указаць
нам шлях да шчасця, якое мы можам атрымаць ад Бога”, - напісана ў Імшале.
Звяртаецца
ўвага на тое, што кульмінацыяй візіту Бэнэдыкта XVI стане св. Імша, якая пройдзе ў
нядзелю 20 лістапада, ва Урачыстасць Езуса Хрыста Валадара Сусвету на “Стадыёне сяброўства”
у Катану. Літургія пройдзе на лацінскай мове і будзе суправаджацца грыгарыянскім спевам.
“Будуць таксама гучаць афрыканскія спевы і літургічная музыка Бенінскага Касцёла”,
- адзначаецца ў Імшале. Падчас св. Імшы будуць выкарыстоўвацца мясцовыя афрыканскія
мовы: лінгала, дзітамары, міна, ідааха, локпа і барыба.
Асобная частка Імшала
прысвечана апісанню лагатыпа Апостальскага падарожжа Папы і тлумачэнню яго значэння.
Лагатып уяўляе сабой контур Афрыкі, які нагадвае выяву галуба – сімвалу міра і добра
перадае асноўную мэту візіту Пантыфіка на афрыканскі кантынент. Накірунак палёта галуба
пазначаны трыма колерамі – зялёным, жоўтым і чырвоным – колерамі дзяржаўнага сцяга
Беніна. Голуб, намаляваны на лагатыпе, ляціць на усход, які сімвалізуе месца прысутнасці
Бога. У цэнтры лагатыпа размешчана выява крыжа залатога колеру, які разам з белым
колерам сімвалізуе сцяг Ватыкана, а таксама радасць і збаўленне для ўсёй Афрыкі.