Papa nesër takon në Vatikan shoqatat evropiane të vullnetarëve
Me rastin e Vitit Evropian të Vullnetariatit 2011, vullnetarët katolikë të Kontinentit
të Vjetër mblidhen në Romë më 10 e 11 nëntor për të takuar Atin e Shenjtë, për të
bërë një bilanc të “Vitit” e për të përcaktuar linjat kryesore udhëheqëse për aktivitetin
e ardhshëm. Organizatat joqeveritare të vullnetarëve duhet t’u kujtojnë qeverive
ndërkombëtare ato parime etike që i ushqejnë dhe frymëzojnë nismat e tyre në shërbim
të njeriut në tërësinë e tij në sektorë të ndryshëm të shoqërisë”. Kështu shkruan
gazeta e përditshme l’Osservatore Romano në pragun e takimit që mbahet nesër në Vatikan
mes Papës Benediktit XVI dhe shoqatave kryesore evropiane të vullnetariatit. “Pjesëmarrja
dhe bashkëpunimi i përfaqësuesve të shoqatave joqeveritare (Ong) me propozime të qëlluara,
të drejtpeshuara e të mençura, pranohet pozitivisht kudo – vijon artikulli që njofton
mbi punimet e Forumit evropian të vullnetariatit që fillon sot me nismën e Këshillit
Papnor ‘Cor Unum’ – në mjediset ndërkombëtare, megjithëse jo gjithmonë mendimi dhe
doktrina që propozojnë kuptohen e pranohen në dokumentet zyrtare”. Sipas gazetës
Osservatore Romano, “është fjala për një dëshmi të nevojshme, për shërben të bërë
që zëri i katolikëve të dëgjohet në mënyrë të duhur”. ”Ungjillëzimi i ri i politikës,
ndërkombëtare – shpjegon artikulli – është edhe qëllimi i fundit që synon, mes tjerash,
Forumi i Organizatave joqeveritare me frymëzim katolik”. Nga ana e tyre, përfundon
shënimi, “katolikët që formojnë shoqatat dhe organizatat joqeveritare vullnetare,
ofrojnë edhe reflektimin e tyre rreth sfidave që duhen ballafaquar dhe modalitetet
përmes të cilave mesazhi i Ungjillit përçohet në veprimtaritë dhe nismat e tyre”.
Në këtë kontekst, “çështja e parë që paraqitet – përfundon Osservatore Romano – është
ajo e reflektimit mbi përmasën ungjillëzuese që ka veprimtaria e tyre, e cila, nganjëherë
zbehet apo errësohet nën aspektet e projekteve të zhvillimit e të promovimit njerëzor,
e kështu përmasa shpirtërore kushtëzohet nga një vizion i ngushtë apo krejtësisht
horizontal i jetës”.