Takimi i vullnetarëve katolikë evropianë. Imzot Dal Tozo: Papa falenderon këta dëshmitarë
të bamirësisë
Më 10 e 11 nëntor, në Vatikan, do të zhvillohet takimi i vullnetarëve katolikë evropianë.
Në ngjarjen, që u paraqit nga kryetari i Këshillit Papnor “Cor Unum”, kardinali Robert
Sarah, do të marrin pjesë 160 ipeshkvij e përfaqësues të organizatave katolike bamirëse
nga 25 vende të botës. Të premten, më 11 nëntor, pjesëmarrësit e takimit do të priten
nga Papa Benedikti XVI. Edhe tema e mbledhjes është “Papa dhe vullnetarët evropianë”.
Cilat janë arsyet, që qëndrojnë pas kësaj nisme? Intervistuam sekretarin e dikasterit
“Cor Unum”, imzot Gjovani Pietro Dal Tozo: Korniza është viti evropian i vullnetariatit,
në të cilin na u duk e arsyeshme t’i kushtojmë vëmendje edhe botës së madhe të vullnetarëve
katolikë në Evropë. Ky është shkaku, që Ati i Shenjtë ftoi përgjegjësit dhe ipeshkvijtë
e këtij sektori për t’i inkurajuar në radhë të parë, e pastaj, për t’i falenderuar
për punën, që po bëjnë. Me enciklikën “Deus Caritas Est”, Papa ka treguar vëmendje
të veçantë për dëshminë e Kishës përmes bamirësisë së jetuar të të krishterëve. Motivacioni
i kësaj dëshmie gjendet tek feja, pasi bamirësia lind si shprehje e besimit tonë në
Krishtin. Në Ungjill thuhet qartë: “Prej kësaj do t’ju njohin se jeni dishepujt e
mi: nëse keni dashuri për njëri-tjetrin”. Jo më kot, takimi do të bëhet më 11 nëntor,
në festën liturgjike të Shën Martinit, i cili njihet si shenjti që i dha mantelin
nevojtarit.