Румынія: іерархі ўсходняга абраду падвялі вынікі сустрэчы
3-6 лістапада ў румынскай
Арадэі прайшла ХIV сустрэча каталіцкіх епіскапаў усходняга абрада. У форуме прыняло
ўдзел больш за 70 іерархаў. Працы былі прысвечаны тэме ўкладу Усходніх Каталіцкіх
Цэркваў Еўропы ў новую евангелізацыю. На заканчэнне форуму было апублікавана паведамленне,
у якім адзначаецца, што новая евангелізацыя разглядалася з двух пунктаў гледжання.
З аднаго боку, было адзначана, што Усходнія Каталіцкія Цэрквы ў Еўропе ўносяць адмысловы
і ўнікальны ўклад у працэс новай евангелізацыі. З другога, іерархі пацвердзілі сваю
свядомасць адказу на сучасныя выклікі.
“Крызіс, які перажывае сённяшні свет,
мае па-сутнасці антрапалагічны характар, часткова гэта плён секулярызму, які прывёў
да неапраўданага выключэння Бога з публічнай і прыватнай сфер чалавека”, - адзначаецца
ў заключным паведамленні. На думку іерархаў, гэта прывяло да моцнай дэзарыентацыі
чалавечай ідэнтычнасці, па прычыне якой сучасны чалавек часта не ў стане асэнсаваць
сябе самога і сваё існаванне.
У паведамленні адзначаецца, што “Усходнія Каталіцкія
Цэрквы павінны змагацца з гэтымі праблемамі. Пасля атрымання 20 гадоў таму свабоды,
яны павінны добра асэнсаваць гэтыя спецыфічныя глабальныя з’явы, якія закранаюць іх
шматлікіх вернікаў, што эмігруюць у іншыя краіны”. “Гэта прыносіць Усходнім Цэрквам
краін, у якія прыбываюць эмігранты, асаблівыя пастырскія выклікі, што патрабуюць адпаведных
рашэнняў”.
Было вырашана, што ХV сустрэча епіскапаў усходняга абараду пройдзе
8-11 лістапада 2012 г. у харвацкім Загрэбе.