Papa kujton kardinajtë që ndërruan jetë gjatë këtij viti: dashuria e Zotit është më
e madhe se humnera e vdekjes
Kryqi i Krishtit shëlboi njeriun dhe natyrën, duke treguar se dashuria e Zotit për
krijesat e tij është më e madhe se humnera e vdekjes. Ky qe mendimi kryesor i Papës
Benediktit XVI, i cili sot paradite, kremtoi një meshë në Bazilikën e Shën Pjetrit,
për shpirtin e dhjetë kardinajve, që ndërruan jetë gjatë këtij viti. I kujtoi me emër,
duke ia besuar Zotit shpirtërat e tyre: “Për të gjithë e për secilin, lutemi,
të frymëzuar nga feja në jetën e pasosur e në misterin e bashkimit të shenjtorëve”. Një
ditë pasi Kisha Katolike përkujtoi besimtarët e vdekur, të cilëve u kushtohet krejt
muaji nëntor, Ati i Shenjtë vazhdoi reflektimin e tij për domethënien e vdekjes për
të krishterin, reflektim, që e filloi dje, gjatë audiencës së përgjithshme. Para vdekjes,
nënvizoi Benedikti XVI, nuk mund të mos provojmë ndjenja e mendime, që na diktohen
nga kushtet tona njerëzore. Por shpresat e të krishterit bazohen në Krishtin, në ato
tri ditë, në të cilat Ai e mundi vdekjen, duke premtuar shëlbimin për gjithë njerëzimin.
E duke komentuar leximet e Liturgjisë së sotme, Papa theksoi: “Humnera e vdekjes
mbushet nga diçka edhe më e madhe, që është dashuria e Zotit, kështu që vdekja nuk
ka më asnjë pushtet as mbi Jezu Krishtin, as mbi ata, që për hir të fesë e të pagëzimit,
bashkohen me Të: “Nëse kemi vdekur me Krishtin – thotë Shën Pali – besojmë edhe se
do të jetojmë me Të”. Kjo shpresë e jetës pas vdekjes, vazhdoi Ati i Shenjtë,
bëhet siguri vetëm në Krishtin. Është Ai që i jep kuptim e bazë të vërtetë, asaj,
që përshkruan edhe Ozea profet në liturgjinë e sotme, e që rrezikon të shndërrohet
në iluzion, në një simbol, që vjen nga ritmi i sezoneve, nga kalimi prej shiut të
vjeshtës në atë të pranverës. Në kohën e profetit, shpjegoi Papa, feja e izraelitëve
rrezikonte të ndikohej nga fetë natyraliste të tokës së Kanaanit, por këto lloj fesh
nuk janë në gjendje të shpëtojnë askënd. Ndërsa, ndërhyrja e Zotit në historinë e
njerëzimit nuk u bindet cikleve të natyrës, por vetëm besnikërisë e dashurisë së Tij
për botën. Kjo jetë e re ka vërtet simbol pemën, ashtu si në librin e Ozesë, por për
të krishterët, ky dru, që jep fryte, është Kryqi: “Pa Kryqin e Krishtit, e gjithë
energjia e natyrës mbetet e pafuqishme para forcës negative të mëkatit. Ishte e nevojshme
një forcë mirëbërëse më e madhe se ajo që ndryshon ciklet e natyrës, një e Mirë më
e madhe se vetë krijimi: një Dashuri, që del nga “zemra” e vetë Zotit e që, ndërsa
zbulon kuptimin e fundmë të Gjithësisë, e ripërtërin dhe e orienton kah horizonti
i saj fillestar e i fundmë”. Këtë bëri Zoti, në ato tri ditë që ndajnë vdekjen
e Jezusit nga Ringjallja e Tij e, mbi të cilat, bazohen dymijë vjet krishterim, përfundoi
Papa Benedikti XVI.