Në Kanë takimi i G20-ës. Marrëveshje për taksë mbi transaksionet financiare
Filloi sot në Kanë të Francës mbledhja dyditore e G20-ës, e cila u parapri nga Takimi
i emergjencës për përballimin e krizës ekonomike. Në qendër të diskutimeve të Francës,
Gjermanisë, Fondit Monetar Ndërkombëtar dhe institucioneve të tjera të Bashkimit Evropian
ishte Greqia dhe gjendja e saj, pas vendimit të kryeministrit Papandreu për të mbajtur
një referendum mbi masat ekonomike të marra, për të përfituar nga ndihmat ndërkombëtare.
Pas presionit ndërkombëtar, Greqia vendosi të heqë dorë nga konsultimi popullor për
planin e shpëtimit të vendit nga falimentimi. Kjo është atmosfera, në të cilën
u hap Takimi i 20 të mëdhenjve të botës, në të cilin ushtrohet presion edhe mbi Italinë.
Vetëm mbrëmë vonë, nga mbledhja e qeverisë së Romës, doli një maksiamendament për
ligjin e stabilitetit, i cili shkakton diskutime e debate. Sot paradite, presidenti
amerikan Barak Obama u takua me homologun francez Nikolas Sarkozì e me kancelaren
gjermane Angela Merkel, së cilës i njohu rolin e liderit në Evropë. E kush është në
kërkim të lajmit bombë, të paktën një është bërë i njohur: Franca dhe Amerika kanë
rënë dakord mbi vendosjen e një takse për transaksionet financiare. Opinioni i pedagogut
të ekonomisë politike në Universitetin Katolik të Milanos, prof. Anxhelo Baljoni: Jemi
në një fazë dramatike, në të cilën shpërbërja e zonës së euros mund të sjellë zhvlerësimin
e fuqishëm të veprimtarive financiare të aktorëve të tjerë botërorë, përveç Greqisë,
si bankat ndërkombëtare, bankat qendrore. Deri tani, krijimi i euros bazohej mbi faktin
se askush nuk mund të dilte nga eurozona. Nëse një vend i zhytur në borxhe, si Greqia,
do të dilte, kjo mund të krijojë përshtypjen se në një fazë të mëvonshme, edhe vende
të tjera me borxhe të mëdha, si Italia, Spanja, Portugalia, mund të dalin nga euro.
Është një perspektivë shumë negative, hap i madh mbrapa për Evropën.