Святы Айцец прыняў даверчыя граматы новага пасла Бразіліі пры Апостальскай Сталіцы
31 кастрычніка Бэнэдыкт
XVI прыняў даверчыя граматы новага пасла Федэратыўнай Рэспублікі Бразілія пры Апостальскай
Сталіцы, спадара Альміра Франко Дэ-Са-Барбуда. У сваёй прамове да дыпламата Папа нагадаў,
што дыпламатычныя адносіны паміж Апостальскай Сталіцай і Бразіліяй былі ўстаноўлены
адразу пасля абвяшчэння незалежнасці гэтай паўднёваамерыканскай краінай у 1822 г.
“Гэта было вынікам доўгіх адносін паміж Бразіліяй і Каталіцкім Касцёлам, якія пачаліся
26 красавіка 1500 г. Гэтыя адносіны пакінулі шматлікія сведчанні хрысціянскіх святых,
а таксама рэлігійныя помнікі, якія сёння служаць сімвалам ідэнтыфікацыі краіны ў свеце,
як, напрыклад, статуя Хрыста Збаўцы з распрасцёртымі рукамі, якімі ён благаслаўляе
ўсю краіну”, - сказаў Бэнэдыкт XVI. Папа адзначыў, што Касцёл дапамагаў, таксама,
у выхаванні бразільскага духа, які характарызуецца шчырасцю, працавітасцю, павагай
да сямейных каштоўнасцяў і чалавечага жыцця.
Бэнэдыкт XVI нагадаў аб важнасці
канкардата падпісанага паміж Бразіліяй і Апостальскай Сталіцай у 2008 г. і які “не
з’яўляецца крыніцай прывілегій для Касцёла, але надае афіцыйны характар супрацоўніцтву
паміж гэтымі двума рэальнасцямі”.
“Дзяржава павінна гарантаваць магчымасць
свабоды веравызнання, а таксама культурнай, адукацыйнай, дабрачыннай дзейнасці і спрыяць
пабудове грамадскага жыцця на фундаменце маральных каштоўнасцяў. Уклад Касцёла, аднак,
не абмяжоўваецца толькі адукацыйнай і гуманітарнай дзейнасцю, але павінен спрыяць
маральнаму росту грамадства”, - падкрэсліў Пантыфік.
Папа запэўніў новага пасла
Бразіліі, што яго ўрад можа разлічваць на дапамогу Касцёла ў вырашэнні праблем звязаных
з барацьбой з беднасцю і голадам. “Касцёл не можа паставіць сябе на месца дзяржавы,
але ён таксама не можа заставацца ў баку ад барацьбы за справядлівасць”, - нагадаў
Святы Айцец.
Новы пасол Бразіліі пры Апостальскай Сталіцы спадар Альмір Франко
Дэ-Са-Барбуда з’ўяляецца выпускніком Папскага каталіцкага універсітэта ў Рыа-дэ-Жанэйра.
На дыпламатычнай службе знаходзіцца з 1969 г. Працаваў у якасці пастаяннага прадстаўніка
Бразіліі пры ААН у Жэневе, пры ФАО ў Рыме, быў генеральным консулам у ЗША, паслом
у Бельгіі і Люксембурге.