Liturgjia e Fjalës së Zotit e së dielës së 31-të gjatë vitit kishtar ‘A’
Ja përsëri në takimin tonë javor me Fjalën e Zotit, kësaj radhe do të dëgjojmë e meditojmë
së bashku leximet biblike të liturgjisë së Fjalës Hyjnore të dielës së 31 gjatë vitit
kishtar, ciklit të parë, sipas kalendarit liturgjik. Tema kryesore që trajtohen
nga leximeve biblike të kësaj është autenticiteti i jetës, posaçërisht i jetës së
atyre që kanë përgjegjësinë dhe autoritetin në bashkësitë fetare e shoqërore. Toni
e stili profetik i Jezusin në pjesën ungjillore të kësaj së diele janë kundër sjellje
së hipokrizisë, të sjelljes së pandershme, të padrejtë. Jezusi padit hipokrizinë.
Autenticiteti i krishterë nuk është, pra nuk qëndron në ritualizmin formal, në fjalët
që fshehin apo mashtrojnë, po në marrjen serioze të besnikërisë ndaj urdhrit të dashurisë
të cilin Krishti e ka vënë si themel të jetës. Thirrja humanizuese që Jezusi i
drejton atij që dëshiron e do ta ndjek pas është thirrje për të marr mbi vete përgjegjësitë
tona në mënyrë besnike, koherente. Qortimi që Jezusi bënë në pjesën e Ungjillit
të kësaj së diele (Mt 23,1-12), është kundër rrezikut të hipokrizisë: drejtësia dhe
mëshira para syve të Zotit janë më të rëndësishme se zbatimi formal e i jashtëm i
Ligjit. Sjellja hipokrite bëhet lehtë gënjeshtër ndaj vetvetes sonë e mashtrim ndaj
tjerëve, prandaj ajo përjashtohet krejtësisht nga përvoja e vërtetë e fesë, e nuk
mund të jetë dukuri e njeriut që beson në Zotin e aq më pak e atij që ka autoritetin
e udhëheqjes e të shërbimit në bashkësi. Pra tërheqja e vëmendjes dhe qortimi që
bënë Jezusi për t’u ruajtur e pasur kujdes para mungesës së koherencës në jetë është
në qendër të Ungjillit të kësaj së diele. Dashuria, bindja apo dëgjesa dhe respekti
duhet të përbëjnë thelbin, pra shpirtin e thellë të kultit, si shfaqje e marrëdhënies
autentike ndërmjet besimtarit e Zotit. Me fjalë tjera, Ungjilli na fton që veprat
dhe stili i jetës sonë të jetë në përkim me fenë, pra me besimin në Të, Jezu Krishtin. Ungjilli
i kësaj së diele përmend tri gabime që e zbrazin jetën. Hipokrizia: thonë e nuk bëjnë;
mburrja: gjithçka veprojnë e bëjnë me qëllim që t’i shohin njerëzit e për të qenë
të admiruar publikisht; Synimi i pushtetit: të tjerëve ua ngarkojnë barrën e rëndë
mbi krah por ata vetë as me gisht nuk lëvizin. E padia e Jezusit para këtyre e padrejtësive
tjera na ofron tjera rregullore për të vërtetën e jetës: të veprojmë në heshtje, pa
u dukur publikisht e para njerëzve, të punojmë me thjeshtësi e pa dyfytyrësi, shërbimi
le të jetë pushtet. Urdhri më i madh, thoshte Jezusi, është “Ti duaje”. Më i madhi
ndër njerëzit, thotë tani, është ai njeri që e zbaton dashurinë në shërbimin e jetës
së përditshme në emër e për dashuri të Zotit e të vëllezërve. Hyji nuk është pronari
i pronarëve, apo mbreti i mbretërve, po është shërbëtori që në Jezusin ua lanë këmbët
dishepujve., Ai është shërbëtori i çdo jete njerëzore. Të mëdhenjtë e të pushtetshmit
e kësaj bote ndërtojnë frone të vdekjes, Zoti nuk ka frone, ai merr në dorë pëlhurën
për t’i mjekuar plagët e tokës. Hyji si një shërbëtor: që nuk kërkon, po mbështet;
nuk pretendon, po përkujdeset; nuk kërkon të drejta, po u përgjigjet nevojave që ka
njeriu. Shërbëtor shembullor edhe për ne. Po më tepër mbi liturgjinë e Fjalës
së Zotit të kësaj së diele mund të dëgjoni këtu......... Liturgjia
e Fjalës
Nga Libri i Malakisë, profet (Mal 1,14-2,1-2.8-10)
Unë jam Mbret i madh - thotë Zoti i Ushtrive - dhe Emri im është i tmerrshëm ndër
kombe! E tani ky urdhër është për ju, o priftërinj! 2 Nëse nuk do të dëgjoni,
nëse nuk do të kujdeseni t’i jepni lavdi Emrit tim - thotë Zoti i Ushtrive - do ta
çoj mallkimin mbi ju e do t’i mallkoj bekimet tuaja! Po, do t’i mallkoj, sepse nuk
patët farë kujdesi! Ju rrugën e latë, me mësimin tuaj shkandulluat shumë, e zhbëtë
besëlidhjen e Levit - thotë Zoti i Ushtrive. Këndej dhe unë ju bëra të përbuzshëm
e të përulur, nga të gjithë popujt, pse s’i mbajtët rregulloret e mia e u bëtë të
njëanshëm në mësimin e Ligjit.” “Pse a s’e kemi të gjithë vetëm një Atë? Pse a nuk
na krijoi të gjithëve një Hyj i vetëm? Pse atëherë secili prej nesh sillemi me dredhi
ndaj vëllait tonë duke e prishur besëlidhjen e etërve tanë? Fjala e Zotit!
Nga
Letra e parë e shën Palit apostoll drejtuar Selaniksave. (2,7-9.13) Vëllezër,
Përkundrazi qemë ndër ju të butë, porsi nëna që ushqen e kujdeset për fëmijët e vet.
Këndej, prej dashurisë që kemi për ju, ishim të gatshëm t’ju shpallim jo vetëm Ungjillin
e Hyjit, por t’ju jepnim edhe jetën tonë, kaq ju kemi pasur për zemër. Dhe vërtet,
vëllezër, patjetër do t’ju bien ndër mend mundimi dhe vuajtjet tona: kemi punuar natë
e ditë që të mos i bëheshim ndokujt barrë dhe ju predikuam Ungjillin e Hyjit. Prandaj
edhe ne, prej anës sonë, pa pushim i falemi nderit Hyjit për ju që, kur e morët fjalën
e Hyjit, të dëgjuar prej nesh e morët, jo porsi fjalë njerëzish, por pikërisht ashtu
si në të vërtetë është - porsi fjalën e Hyjit - që vazhdimisht vepron në ju që besoni. Fjala
e Zotit!
Nga Ungjilli i Shenjtë sipas Mateut (Mt 23,1-12) Atëherë
Jezusi i tha turmës dhe nxënësve të vet: “Në katedrën e Moisiut ndenjën skribët e
farisenjtë. Pra, ju duhet t’i dëgjoni e të zbatoni gjithçka t’ju thonë, por mos bëni
si bëjnë ata. Ata nuk veprojnë siç thonë. Ata lidhin barrë të rënda që mezi mund të
barten dhe ua ngarkojnë njerëzve në krahë, kurse vetë as me gisht nuk i luajnë. Pastaj
të gjitha veprat e veta i bëjnë me qëllim që t’i shohin njerëzit. Këndej i zgjerojnë
filakteritë e veta dhe i zgjasin thekët. Në gosti dëshirojnë kryet e vendit, në sinagoga
vendet e para, përshëndetjet në sheshe dhe të quhen prej njerëzve ‘rabbi’. Ju mos
lejoni t’ju quajnë rabbi, sepse vetëm njëri është Mësuesi juaj, kurse ju të gjithë
jeni vëllezër. Dhe përmbi tokë mos thirrni askënd Atë, sepse keni vetëm një Atë -
atë që është në qiell! Gjithashtu mos lejoni t’ju quajnë udhëheqës - sepse keni vetëm
një Udhëheqës - Krishtin! Më i madhi ndër ju le të jetë shërbëtori juaj. Sepse, kush
krenohet, do të përvujtërohet e kush përvujtërohet do të lartësohet. Fjala e Zotit!