Папа да ўдзельнікаў сустрэчы ў Асізі: падарожжа духа заўсёды з’яўляецца падарожжам
міру
28 кастрычніка ў 11.30
Святы Айцец сустрэўся з удзельнікамі “Дня разважання, дыялога і малітвы за мір і справядлівасць
у свеце”, які праходзіў учора ў італьянскім Асізі. Папа прывітаў сабраных у Клеменцінскай
зале Апостальскага Палаца прадстаўнікоў шматлікіх рэлігій і яшчэ раз падзякаваў за
гатоўнасць прыняць удзел у форуме, які праходзіў у 25 гадавіну першай сустрэчы ў Асізі,
натхняльнікам і арганізатарам якой быў бл. Ян Павел ІІ.
Бэнэдыкт XVI адзначыў,
што у пэўным сэнсе, асізская сустрэча стала адлюстраваннем імкнення мільярдаў мужчын
і жанчын ва ўсім свеце, якія актыўна ўдзельнічаюць у барацьбе за справядлівасць і
мір. “Гэта таксама знак сяброўства і братэрства, што заквітнеў як плён высілкаў шматлікіх
піянераў такога тыпу дыялога”, - сказаў Папа.
“Я дзякую маім братам і сёстрам
хрысціянам за братэрскую прысутнасць. - сказаў Святы Айцец. - Я таксама дзякую прадстаўнікам
яўрэйскага народа, асабліва блізкага нам, і ўсім вам, паважаныя прадстаўнікі сусветных
рэлігій. Я ведаю, што многія з вас прыбылі здалёк і ўзялі на сябе цяжкасці падарожжа.
Я выказваю падзяку і тым, хто прадстаўляе людзей добрай волі, якія не належаць ні
да якой з рэлігійных традыцый, але імкнуцца да пошуку ісціны. Яны былі гатовыя падзяліць
гэту пілігрымку з намі, што стала сімвалам іх жадання працаваць разам, каб пабудаваць
лепшы свет”. На думку Святога Айца, “падарожжа духа заўсёды з’яўляецца падарожжам
міру”.
Святы Айцец адзначыў, што падобныя сустрэчы дастаткова выключныя і рэдкія,
але “яны з'яўляюцца яркім выразам таго факту, што кожны дзень, у нашым свеце, людзі
розных рэлігійных традыцый жывуць і працуюць разам у гармоніі”. “Такім чынам, я ўпэўнены,
што ўчарашняя сустрэча дала нам зразумець, наколькі шчырае наша жаданне ўнесці свой
уклад у дабро ўсяго нашага чалавецтва, і наколькі мы павінны даваць сябе адзін аднаму”.
“Мы
ідзём кожны сваёй дарогай, але давайце чэрпаць сілы з гэтага вопыту і, дзе б мы ні
былі, давайце працягнем аднаўляць сябе на шляху, які вядзе да ісціны, у паломніцтве,
якое вядзе да міру”, - сказаў у заключэнні Святы Айцец.
На міжрэлігійнай асамблеі
ў Асізі прысутнічалі пасланцы 31 хрысціянскай супольнасці, дэлегаты нацыянальных біскупскіх
канферэнцый, Патрыярхі і архірэі Усходніх Цэркваў, дэлегацыя англіканскай супольнасці
на чале з арцыбіскупам Кентэрберыйскім Роуэнам Уільямсам. У вялікай групе прадстаўнікоў
Праваслаўных Цэркваў знаходзіўся Патрыярх Канстантынопальскі Барталамей I. У складзе
дэлегацыі Маскоўскага Паірыярхата быў Мітрапаліт Мінскі і Слуцкі Філарэт.
У
форуме прыняло ўдзел таксама 170 прадстаўнікоў розных нехрысціянскіх рэлігій – юдэі,
мусульмане, індуісты, сікхі, будысты, канфуцыянцы, сінтаісты, а таксама прадстаўнікі
традыцыйных вераванняў Афрыкі, Аўстраліі і Амерыкі.