Reagim pozitiv i bursave botërore pas arritjes së marrëveshjes evropiane për fuqizimin
e Fondit për shpëtimin e shteteve e për ndihmat e reja, që do t’i jepen Greqisë. Një
maratonë bisedimesh, që zgjati gjithë natën, përcaktoi më në fund një plan ekonomik
për Bashkimin Evropian, në të cilin parashikohen 1000 miliard euro për të shpëtuar
vendet në vështirësi nga falimentimi, ndihma të reja për Greqinë dhe rikapitalizimi
i bankave. U pranua edhe reforma ekonomike e Italisë, për të cilën Brukseli kërkoi
kohë të mirëpërcaktuara për zbatimin. Të sqarojmë pak më mirë ç’është Fondi për shpëtimin
e shteveve, në intervistën me ekonomistin italian, Rikardo Moro: Flitet
për përfshirjen e aktorëve të tjerë sovranë, si Kina; flitet për përfshirjen e aktorëve
privatë… më duket rrugë e drejtë. Mekanizmi nuk është përcaktuar përfundimisht, por
është sinjali, që prisnin të gjithë. Që prej dy vjetësh, me situatën në Greqi, filloi
kjo krizë evropiane, e cila mund të përfundonte me kosto shumë të ulët, nëse do të
ndërhyhej që në fillim: flitej për disa miliardë euro, në atë kohë. Egoizmi i shteteve
të ndryshme solli sot në një impenjim, që shkon në rreth 500 miliard euro e që mund
të rritet. Por nuk ka alternativë tjetër, përveçse solidaritetit institucional të
vendeve të Bashkimit Evropian. Prandaj, Fondi për shpëtimin e shteteve është diçka
pozitive, pavarësisht se arrin vonë.