Benedikti XVI: dhuna e lufta nuk janë në natyrën e fesë. Papa me tren në Asizi për
një ditë reflektimesh, dialogu e lutjeje për paqen e drejtësinë në botë
Është e nevojshme të përsëritet edhe sot, ç’thanë krerët fetarë më 1986 në Asizi:
kurrë, fetë nuk mund të jenë shkak për dhunë e luftë. Kështu foli sot Papa Benedikti
XVI në fjalimin, që mbajti para përfaqësuesve të traditave të ndryshme fetare të botës,
mbledhur në Bazilikën e Shën Marisë së Engjëjve në Asizi të Italisë për Takimin e
paqes, i cili mbush 25 vjet, që nga themelimi i tij nga i Lumi Gjon Pali II. Dhuna
e lufta nuk janë në natyrën e fesë, nënvizoi Papa Racinger, i cili bëri “mea culpa”
edhe për fajet e të krishterëve. “Si i krishterë – theksoi Benedikti XVI – dua të
them se gjatë historisë, në emër të fesë së krishterë, është përdorur dhuna. E pranojmë,
me turp të madh”. Ati i Shenjtë sqaroi se në këto raste, është abuzuar me fenë, prandaj,
është detyrë e autoriteteve të saj ta purifikojnë atë vazhdimisht, duke vënë gjithnjë
në qendër Kryqin e Krishtit, në mënyrë që, megjithë dobësitë e njeriut, ajo të jetë
vërtet mjet paqeje në botë.