Bazilika e Shën Françeskut ngrihet në vendin ku deshi të varrosej i Vobekti i Asizit.
Në Mesjetë, kjo zonë njihej si “kodra e ferrit”, pasi aty bëheshin ekzekutime publike
si në malin e Kalvarit, ku kryqëzuan Krishtin. Kisha shtrihet në tri nivele: Kripta,
Bazilika e poshtme dhe Bazilika e epërme. Kantieri për ndërtimin e saj u hap në
vitin 1228, me urdhër të Papës Gregori IX, falë veprimtarisë së fra Elisë, mik i shenjtit
e eprori i dytë i bashkësisë. Më 16 korrik të atij viti, vetëm dy vjet pas vdekjes,
Françesku shpallet shenjt e të nesërmen, vetë Papa dhe eprori i ri i Urdhërit vendosën
gurin e parë të Bazilikës, ku pushojnë eshtrat e shenjtit. Kaq shumë ishte përhapur
fama e shën Françeskut, sa për ndërtimin e kishës erdhën oferta të jashtëzakonshme.
Kështu, u bë e mundur që krejt kompleksi të përfundonte në një kohë rekord për atëherë,
në pak më tepër se një shekull. Varri i shenjtit dhe dy kishat. Në vitin
1230, trupi i shën Françeskut transferohet në kishën e shën Gjergjit (kisha e ardhshme
e shën Kiarës) për t’u varrosur më pas në bazilikën e ndërtuar për nder të tij. Nën
elterin e madh, në një vend, që për shekuj, nuk mund të shihej, pika e saktë e varrosjes
harrohet. Rigjehet në shekullin XIX e aty bëhet Kripta. Që atëherë, Asizi është etapë
thelbësore për shtegtarët që shkojnë në Romë. Kompleksi përbëhet nga dy kisha të pavarura,
vendosur njëra mbi tjetrën, si edhe nga kripta. Sipas projektit fillestar, të dyja
kanë vetëm një navatë, por më vonë, bazilika e poshtme pasurohet me kapelat anësore. Këmbanorja.
E stilit romak, këmbanorja lartohet drejt qiellit, “e penguar” vetëm nga korniza e
harqe, që e zbukurojnë edhe më tepër. Përballë hyrjes së Bazilikës së Poshtme gjendet
ish-Oratoriumi i Shën Bernardit, ndërtuar për Urdhërin e Tretë françeskan nga mjeshtra
lombardë, rreth gjysmës së shekullit XV. Pas portës hyhet në Kuvendin e Shenjtë, ku
përveç bashkësisë së fretërve të vegjël, ndodhet edhe Instituti Teologjik, një Qendër
dokumentash dhe një fond i rëndësishëm arkivor e bibliotekar, i specializuar në françeskanizëm. Tërmeti
i vitit 1997. Tërmeti i 26 shtatorit të vitit 1997 i shkaktoi dëme të mëdha Bazilikës
së Epërme. Kupola ra në dy pika, duke shkaktuar vdekjen e katër vetëve. 130 metra
me afreske mesjetare u bën hi e pluhur. Restaurimi zgjati dy vjet. Tërmeti shkaktoi
edhe prishjen e pjesshme të afreskeve si ai i Shën Jeronimit, që disa ia atribuojnë
Xhotos së ri, ku paraqiten katër Doktorë të Kishës; u dëmtua edhe figura e shën Mateut
në afreskun e Katër Ungjilltarëve të Çimabues, si edhe qielli me yje i pikturuar në
vitet ‘800. Ranë në tokë tetë figura shenjtorësh dhe dekoracione të tjera. Ç’kanë
brenda dy kishat. Hyhet në Bazilikën e Poshtme përmes një portiku të dyfishtë
gotik mbi të cilin ndodhen tre rozeta, gjithnjë në stil gotik e një portik i shekullit
XV. Navata e vetme është e ndarë në pesë ndërtrenë. I pari, ai i hyrjes është pikturuar
nga Sermei e Marteli, majtas ndodhet kapela e shën Sebastianit me afreske të ‘600-ës
të G. Martelit. Djathtas, dy varre gotike dhe një tribunë. Pasi kalohet kapela e Shna’Ndout
Abat, përmes një porte në të djathtë, hyhet në një kiostër të vogël e më pas në kapelën
e Shën Katerinës, ku ruhen afreske me “episode nga jeta e Shenjtes”, vepër e Andreas
nga Bolonja. Navata pasurohet me afreske të shumta të viteve ‘200, vepër e Mjeshtrit
të Shën Françeskut. Në gjysmën e navatës, dy shkallë të çojnë në Kriptë, ku ruhen
eshtrat e shenjtit. Vetratat janë të shekullit XIII dhe XIV e zbukurojnë kapelat e
shumta të shekullit XIII. Në të djathtë, kapela e shën Shtjefnit me afreske të viteve
‘500 të Doni Donit, pastaj kapela e shna’Ndout të Padovës me vepra të Sermeit, ajo
e shën Madalenës me afreske të Xhotos e të Mjeshtrit të Velave, kapela e shën Martinit
me afresket e Simon Martinit në fillimet e shekullit XIV. Drejt presbiterit, elteri
i madh elegant është i shekullit XIII e mbi harqet e voltës janë pikturuar afreske
të shkollës së Xhotos, që pasqyrojnë virtytet françeskane (pastri, varfëri, bindje)
e me radhë, vepra të tjera e afreske, që nga Xhovani Orsini e deri te Pjetro Lorenceti.
Nga një shkallë, që fillon në terracën me pamje nga Kiostri i Madh i viteve ‘400,
mund të ngjitesh në Bazilikën e Epërme, me afreske të shekullit XIII e XIV, nga artistët
më të mëdhenj të kohës: Xhoto, Çimabue, Pjetro Kavalini, Jakopo Torriti etj.. Afresket
e navatës, që pasqyrojnë “episode nga jeta e shën Françeskut”, i atribuohen Xhotos,
i cili ka punuar këtu edhe me nxënësit e vet.