Кардынал Таран: сустрэча ў Асізі таксама для агностыкаў
27 кастрычніка ў Асізі
прыбудзе Бэнэдыкт ХVI, а таксама прадстаўнікі іншых рэлігій свету, каб разам маліцца
за мір у свеце. Аб значэнні гэтай сустрэчы расказаў нашаму радыё кардынал Жан-Луі
Таран, старшыня Папскай рады па міжрэлігійным дыялогу. Іерарх падкрэсліў, што сёння
мы жывём у нявызначаным свеце, у якім не ўсе людзі могуць разлічваць на справядлівасць
мір. У многіх раёнах свету вядуцца войны. Вось чаму Бэнэдыкт ХVI пажадаў правесці
гэтую ўжо трэццю сустрэчу.
“Сустрэчы ў Асізі сведчаць аб тым, што для абароны
ўласных правоў існуе яшчэ адно вымярэнне, якое адрозніваецца ад узброенай барацьбы,
гаворка ідзе пра малітву, якая пераўзыходзіць розніцы паміж рэлігіямі. Малітва выражае
адносіны з Найвышэйшай ўладай, якія перавышаюць нашы чалавечыя здольнасці. Практыкуючы
тое, што з’яўляецца агульным для ўсіх духоўных сем’яў: гэта значыць малітву, пост
і пілігрымаванне, неабходна паказаць, што рэлігіі з’яўляюцца фактарам міру, а не вайны.
Мы ўсе знаходзімся на шляху да крыніцы святла. Сустрэча ў Асізі паклікана паказць,
што праўду ў свеце шукаюць не толькі хрысціяне”.
Старшыня Папскай рады па
міжрэлігійным дыялогу адзначыў, што форум у Асізі мае асаблівы характар. “На гэты
раз падчас сустрэчы больш часу будзе прызначана на роздум і малітву. Акрамя таго,
у мерапрыемстве прымуць удзел таксама агностыкі”, - адзначыў кардынал Жан-Луі Таран.