Іерусалім: афіцыйнае адкрыццё табліцы з малітвай “Ойча наш” па-беларуску
Сёння здейснілася
мара беларускіх католікаў. Раніцай 25 кастрычніка ў Іерусаліме была асвечана табліца
з малітвай “Ойча Наш” па-беларуску, якую ўсталявалі на сцяне храма “Pater Noster”.
На св. Імшы, падчас якой асвяцілі “малітву ў камяні”, прысутнічалі ўсе беларускія
біскупы, прадстаўнікі дыпламатычнага корпусу і шматлікія пілігрымы. Усе яны накіраваліся
на Святую Зямлю з галоўнай мэтай – даць сведчанне аб Каталіцкім Касцёле ў Беларусі.
На сценах “Pater Noster”, або як яго яшчэ называюць – Касцёла Нацый, ужо размешчана
130 табліц з галоўнай хрысціянскай малітвай на розных мовах. Пілігрымка з нагоды асвячэння
“нашай” табліцы атрымалася агульнанацыянальнай – у Іерусалім прыляцелі больш за 150
вернікаў з усёй Беларусі. І для ўсіх гэта падзея стала сапраўдным святам.
Беларусам
дазволілі зрабіць даволі вялікую табліцу – 2 м увышыню і 1,2 м ушырыню – і гэта нягледзячы
на тое, што на сцяне храма засталося не шмат свабоднай плошчы. Бо касцёл гэты знакавы
– менавіта на гэтым месцы Збаўца навучыў маліцца сваіх вучняў, упершыню прамовіўшы
словы “Ойча Наш”. У пілігрымаў разнастайная праграма, але галоўнае тое, што многія
з іх упершыню дакрануліся да гэтай святыні. Падчас св. Імшы арцыбіскуп Тадэвуш
Кандрусевіч выказаў пажаданне, каб малітва каля гэтай табліцы дапамагала ўсім, хто
будзе звяртацца з просьбай да Бога. А таксама праслаўляла беларускую культуру і нагадвала
аб нашай Бацькаўшчыне мільёнам пілігрымаў з усяго свету, якія штодзённа прыбываюць
у Іерусалім.