Папская рада “Iustitia et pax”: неабходна новая наднацыянальная ўлада
24 кастрычніка Папскай
радай “Iustitia et pax” было апублікавана спецыяльнае пасланне прысвечанае праблемам
сусветнага эканамічнага і фінансавага крызіса, “які выявіў эгаізм, калектыўную прагнасць
і празмернае назапашванне дабротаў”. Сваім дакументам, пад назвай “Для рэформы міжнароднай
фінансавай сістэмы ў пэрспектыве публічнай улады з паўсюднымі кампетэнцыямі”, папская
дыкастэрыя жадае дапамагчы прадстаўнікам розных формаў улады, а таксама ўсім людзям
добрай волі, адпаведна адказаць на выклік крызіса, бо “пад пагрозай знаходзіцца супольнае
дабро чалавецтва і яго будучыня”.
У пасланні Папскай рады асуджаецца эканамічны
лібэралізм без правіл і кантроля, а таксама панаванне трох сучасных ідэалогій: утылітарызма,
індывідуалізма і тэхнакратызма.
“Карані крызіса маюць не толькі эканамічную
ці фінансавую прыроду, але перш за ўсё маральную. Эканоміка мае патрэбу ў этыцы для
свайго добрага функцыянавання”, - цытуюцца ў дакуменце словы Бэнэдыкта XVI. Прадстаўнікі
Папскай рады прапануюць правесці міжнародную фінансавую рэформу, з мэтай большага
кантроля за фінансамі на глабальным узроўні. “Неабходна стварэнне мінімальнага блока
правіл, каб кіраваць сусветным фінансавым рынкам”, - адзначаецца ў пасланні. Падкрэсліваецца
неабходнасць стварэнне новага інстытута, які мог бы выконваць функцыю “Цэнтральнага
сусветнага банка”, г.зн., кіраваць фінансавай сістэмай накшталт цэнтральных нацыянальных
банкаў.
Акрамя таго, звяртаецца увага на тэрміновую патрэбу у новым наднацыянальным
органе палітычнай улады, які народзіцца з свабоднай волі дзяржаў і будзе служыць супольнаму
дабру ўсіх. Папская рада заклікае пакінуць “вестфальскую” сістэму міжнародных адносін,
і скіравацца да большай інтэграцыі.
“Уключыцца ў гэты працес перамен – гэта
місія адначасова сацыяльная і духоўная. Перайсці ад вавілонскага духа, у якім пануюць
падзелы, да духа адзінства у Духу Пяцідзесятніцы. Толькі дух згоды, які пераможа падзелы
і канфлікты, дазволіць чалавецтву быць па-сапраўднаму адзінай сям’ёй”, - адзначаецца
ў пасланні.