Situata e sigurisë në veriun e Kosovës vazhdon të jetë e qetë, por shumë e tensionuar
për shkak të veprimeve të ekstremistëve serbë, të cilët vazhdojnë t'i mbajnë rrugët
e bllokuara. Gjatë një takimi të mbajtur sot Komitetin lokal të sigurisë publike
të Komunës së Mitrovicës, Kryetari i komunës, Avni Kastrati përshëndeti aksionin e
KFOR-it për të zhbllokuar rrugët magjistrale nga barrikadat që kanë vendosur strukturat
paralele serbe në veri të Kosovës. Zyra e shtypit e komunës se Mitrovicës bëri
të ditur se Kryetari Kastrati e vlerësoi këtë si një hap të domosdoshëm për të vendosur
lirinë e lëvizjes në atë pjesë të vendit, ndërsa theksoi se bllokimi i rrugëve është
i papranueshëm, meqë shumë banorë pa dallim të përkatësisë etnike kanë mbetur të izoluar. "Ne
vazhdimisht kemi kërkuar largimin e këtyre barrikadave në mënyrë që të normalizohet
situata dhe njerëzit t'u kthehen aktiviteteve të përditshme", shtoi Kastrati. Ndërsa
Shefqet Aliu, nga Drejtoria për Mbrojtje dhe Shpëtim, tha se, "strukturat e sigurisë
duhet të shtojnë masat tek lagjet me popullatë të përzier në veri dhe se një vëmendje
më e madhe duhet t'u jepet edhe fshatrave shqiptare të Leposaviçit".