Ամին Ժեմայէլ Եւ Միջին Արեւելքի Քրիստոնեաներու Կացութիւնը։
Փաղանգաւոր կուսակցութեան նախագահ Ամին Ժեմայէլ երէկ կէսօրին, մամլոյ ասուլիսի մը ընթացքին
անդրադարձաւ Եգիպտոս կատարած իր այցելութեան արդիւնքներուն: Ժեմայէլ շեշտեց, որ եգիպտացի
պատասխանատուներուն մօտ ինք շօշափած է պատասխանատուութեան զգացում մը, ինչպէս նաեւ մտահոգութիւն
մը` տիրող ներկայ կացութեան վերաբերեալ: Ժեմայէլ աւելցուց, որ եգիպտացի պատասխանատուները
ամէն ջանք ի գործ կը դնեն սրբագրելու համար երկրին մէջ տիրող կացութիւնը եւ օրինականութեան
ճամբով կը փորձեն փարատել վտանգները: Ան նկատել տուաւ, որ ինք առաջարկած է ծրագիր
մը, որ կարելի է որդեգրել յեղափոխութիւններ ապրող արաբական երկիրներուն մէջ: «Մենք
կը մերժենք, որ Եգիպտոսի կամ արաբական որեւէ այլ երկրի մը մէջ քրիստոնեաները ՝՝ըլլան՝՝
Արեւելքի եւ Արեւմուտքի միջեւ տագնապին գինը վճարող կողմերը: Արեւելքի քրիստոնեաները
այս կամ այն կողմին զոհերը պէտք չէ դառնան, եւ ժամանակն է այլեւս, որ անոնց գոյութիւնը
կարելի ըլլայ ապահովել քաղաքացիական նոր օրէնքով մը, որ քրիստոնեայ եւ այլ քաղաքացիներուն
միջեւ հաւասարութիւնը կ՛ամրապնդէ, առանց խտրականութեան», շեշտեց Ժեմայէլ: Ժեմայէլ
ընդգծեց, որ ժողովուրդները պահպանելու համար կարելի չէ բռնատիրութիւններուն ապաւինիլ,
այլ` հարկ է հիմնուիլ օրէնքի եւ սահմանադրութեան վրայ: «Լիբանանի եւ Արեւելքի քրիստոնեաները
չեն ընդունիր մեկուսանալ կամ ջնջուիլ, այլ` անոնք կը մնան ազգային գոյակցութեան պաշտպան
եւ շրջանին մէջ առանցքային դերակատարութիւն ունեցող քաղաքացիներ», եզրափակեց Ժեմայէլ: