Ռուսիոյ վարչապետ Վլատիմիր Փութին անցեալ երեքշաբթի օր Ս. Փեթերսպուրկի մէջ տեղի ունեցած
երկարատեւ հանդիպումէն ետք ուշ գիշերին յայտարարեց, որ շուրջ երկու տասնամեակ շարունակուած
բանակցութիւններէն ետք, ԱՊՀ-ի ութ երկիրներու (որոնց շարքին Հայաստանի վարչապետը) համաձայնեցան
համաձայնագիր կնքել` ազատ առեւտուրի գօտի ստեղծելու շուրջ: Ըստ Փութինի, այս արդիւնքը
բաւական անսպասելի էր բոլորին համար: Փութին նշեց, որ ԱՊՀ-ի պետութիւններէն երեքը`
Ուզպեքիստան, ինչպէս նաեւ քարիւղի եւ կազի հարուստ պաշարներ ունեցող Ազրպէյճան եւ Թուրքմենիստան
մերժեցին ստորագրել փաստաթուղթը, սակայն խոստացան յառաջիկային զայն ուսումնասիրել: Ան
ընդգծեց, որ համաձայնութիւնը անդամ պետութիւններուն կարելիութիւն պիտի տայ աւելի ամրապնդելու
տնտեսական համագործակցութիւնը յետ-խորհրդային տարածքին մէջ: «Մենք փոխադարձաբար իրարու
առջեւ կը բանանք մեր շուկաները, ինչ որ կը նշանակէ, թէ ապրանքները մեր շուկաները պիտի
մտնեն ցած գիներով` ստեղծելով աւելի լաւ պայմաններ նոր միացեալ ձեռնարկութիւններ հիմնելու
համար», ըսաւ Ռուսիոյ վարչապետը: Անդրադառնալով այս փաստին` Հայաստանի վարչապետ Տիգրան
Սարգսեան յայտարարեց, որ խոստմնալից այս գաղափարին մասին ԱՊՀ-ի անդամ պետութիւնները յայտարարած
էին տակաւին 1994-ին, սակայն 15 տարիէ աւելի ոչ մէկ ձեւով կրցան համաձայնութեան գալ այդ
համաձայնագիրի պայմաններուն եւ դրութիւներուն շուրջ:
Ան յայտնեց, որ երեքշաբթի
օրը պատմական է , որովհետեւ այս փաստաթուղթին վրայ 20 տարի աշխատած էին: Ան աւելցուց,
որ այս տարի կը լրանայ ԱՊՀ-ի հիմնադրութեան 20-ամեակը եւ իրեն կը թուի, թէ այս նշանակալի
օրը կը հաստատէ, որ ԱՊՀ ճիշդ ուղղութեամբ կը շարժի: