Benedikti XVI ipeshkvijve australianë: të frymëzuar nga shenjtja Meri MekKillop, impenjohuni
në ungjillëzimin e ri
Kisha australiane është rinovuar falë Ditës Botërore të Rinisë në Sidnej dhe pas kanonizimit
të shenjtes Meri MekKillop: këtë nënvizoi Benedikti XVI në fjalën, që u drejtoi ipeshkvijve
australianë, të cilët i priti sot në Vatikan, me rastin e vizitës së tyre “ad Limina”.
Papa i inkurajoi prelatët të impenjohen në sfidën e ungjillëzimit të ri. Gjithashtu,
u kërkoi atyre të përpiqen për riparimin e të gjitha gabimeve e mëkateve të klerit. “Dita
Botërore e Rinisë – tha Papa – u bekua nga një sukses i madh e vazhdoi të japë fryte.
Kleri dhe besimtarët eksperimentuan gjallërinë e Kishës dhe rëndësinë e përhershme
të Lajmit të Mirë, i cili i duhet shpallur çdo brezi. Shpirti i Shenjtë nuk rresht
kurrë së zgjuari në zemrat e të rinjve dëshirën për shenjtëri dhe zell apostolik”. Këtu,
Papa theksoi se u duhet qëndruar afër të gjithë atyre të rinjve, që reflektojnë seriozisht
mbi mundësinë për t’u bërë meshtarë, ose rregulltarë. Më pas, Benedikti XVI u ndal
në shenjtërimin e Meri MekKillop, apo shën Maria e Kryqit: “Në rrethana sprovash
të mëdha, Meri MekKillop mbeti gjithmonë një nënë shpirtërore, mbushur me dashuri
për fëmijët dhe për gratë, që i ishin besuar”. Ka qenë, vazhdoi Ati i Shenjtë,
edhe një mësuese plot me risi për të rinjtë: “Feja e saj e fuqishme, e shndërruar
në veprimtari plot durim, ka qenë dhurata e saj për Australinë dhe për botën. Shembulli
i saj duhet të frymëzojë prindërit, rregulltarët, mësuesit e të gjithë ata, që kanë
për zemër të mirën e fëmijëve”. Benedikti XVI nënvizoi rëndësinë e formimit,
duke filluar nga katekizmi për fëmijët. Njëkohësisht, shtoi, është e nevojshme që
edhe anëtarët e klerit të ndihmohen e të inkurajohen që t’i kushtojnë kohë e energji
formimit të tyre të vazhdueshëm, duke u thelluar në jetën shpirtërore, në një botë,
e cila shekullarizohet gjithnjë e më tepër. Ati i Shenjtë bëri thirrje për të shëruar
plagët e së kaluarës: “Është e vërtetë se detyra juaj baritore – u tha ipeshkvijve
australianë – është bërë më e rëndë, nga mëkatet dhe gabimet e të tjerëve në të kaluarën,
që janë edhe më të rënda kur bëhen nga anëtarë të klerit e rregulltarë. Megjithatë,
ju keni tani për detyrë t’i shikoni gabimet e së kaluarës me ndershmëri e sinqeritet,
për të ndërtuar, me përvuajtëri e vendosmëri, një të ardhme më të mirë për të gjithë”. Së
fundi, Papa shprehu vlerësimin e tij për përkthimin e ri të Mesharit Romak, fryt i
bashkëpunimit të ngushtë ndërmjet ipeshkvijve dhe Selisë së Shenjtë.