Ministri shqiptar i Kulturës A. Bumçi :Bashkësitë fetare janë mjetet për ringjalljen
shpirtërore të popullit shqiptar
Pas dy ditësh, në Abacinë e Shën Anselmit në Romë, dekani i kolegjit kardinalor, Angjelo
Sodano, me ftesën e Ambasadorit të Shqipërisë në Vatikan, z. Rrok Logu, do të kremtojë
Meshën Shenjte me rastin e 20 vjetorit të marrëdhënieve diplomatike ndërmjet Selisë
së Shenjtë dhe Shqipërisë. Kujtojmë se 20 vjet më parë, marrëdhëniet diplomatike në
rang nunciature për Vatikanin e në rang ambasade për Shqipërinë, u vendosën më 7 shtator
1991. Në Meshën për këtë jubile do të jenë të pranishëm autoritete të larta kishtare
e shtetërore edhe nga Shqipëria, si Presidenti i Konferencës Ipeshkvnore Katolike
të Shqipërisë, imzot Rrok Mirdita dhe ministri i Turizmit, Kulturës dhe Sporteve të
Republikës së Shqipërisë, z. Aldo Bumçi. Të premten, ministri Bumçi
do të takohet edhe me kryetarin e Këshillit Papnor për Kulturën, kardinalin Gjanfranko
Ravazi, për të folur mbi nismën e këtij dikasteri, “Oborrin e paganëve” - debat publik
ndërmjet katolikëve dhe jo besimtarëve – për të cilin, Tirana është zgjedhur si një
nga qytetet pjesëmarrëse, së bashku me qytete të tjera të Evropës. Po të premten,
ministri do të bisedojë me përfaqësues të Veprës Romake të Shtegtimeve, e cila e ka
caktuar Shqipërinë si vend pushimi për shtegtarët, që shkojnë drejt Tokës së Shenjtë.
I telefonuam z. Aldo Bumci për ta pyetur mbi rëndësinë e marrëdhënieve ndërmjet
Shqipërisë dhe Vatikanit dhe mbi takimet që do të ketë në Romë. Intervistën e gjatë
do ta transmetojmë pjesë-pjesë, gjatë këtyre ditëve. Sot, përqendrohemi në rëndësinë
historike të marrëdhënieve me Selinë e Shenjtë dhe në impenjimin e katolikëve në jetën
shoqërore e politike në Shqipëri..….