Бэнэдыкт ХVI павіншаваў з 50-годдзем фонд “Adveniat”
15 кастрычніка ініцыятыва
Канферэнцыі Біскупаў Германіі “Adveniat” адзначае 50-годдзе свайго існавання. З гэтай
нагоды Бэнэдыкт ХVI скіраваў спецыяльнае пасланне да ўдзельнікаў форума гэтай арганізацыі,
які праходзіць у Эсэне. Святы Айцец у пасланні нагадаў, што падчас Адвэнта ў 1961
г. нямецкія біскупы першы раз правялі збор ахвяраванняў на дапамогу Каталіцкаму Касцёлу
ў Лацінскай Амерыцы. “З гэтых глыбокіх сувязяў Касцёла ў Германіі з братамі і сёстрамі
з цэнтральнай і паўднёвай Амерыкі нарадзілася ініцыятыва пад назвай “Adveniat”. Гэтае
шчодрае выражэнне хрысціянскай любові заслугоўвае вялікага прызнання”, - напісаў Папа.
Святы Айцец нагадаў, што гэтая арганізацыя ўдзельнічае ў развіцці грамадства ў якім
людзі могуць жыць у справядлівасці і міры. “Праз шматлікія сацыяльныя і дабрачынныя
праекты, як таксама праз адукацыйныя праграмы ініцыятыва нямецкага епіскапата дала
вялікую падтрымку бедным і слабым”, - адзначыў Святы Айцец.
Ужо бл. Ян ХХІІІ
у лісце ад 11 студзеня 1961 г. выказаў падзяку біскупам Германіі за дапамогу Касцёлу
ў Лацінскай Амерыцы. “Сёння жадаю аднавіць гэтую падзяку і сказаць усім католікам
Германіі “дзякуй”, за 50 гадоў дапамогі”, - падкрэсліў Бэнэдыкт ХVI у сваім пасланні
да нямецкіх католікаў.