Երէկ` 13 հոկտեմբերին «Վիվասէլ-Էմ.թի.էս»ն ու Վայրի բնութեան եւ մշակութային արժէքներու
պահպանման հիմնադրամը յայտարարեցին Հարաւային Կովկասի մէջ միակ բնապահպանման փառատօնին`
«Արեւորդի»ի մեկնարկը: Այս երկու կառոյցներու միջեւ համագործակցութեամբ եւ աջակցութեամբ
կ՛իրականանայ այս ծրագիրը, որ այս անգամ կը գործէ «Քու հետքդ գտիր բնութեան մէջ» խորագիրով
եւ նուիրուած է վայրի բնութեան պահպանման: «Արեւորդի» միջազգային բնապահպանման փառատօնը
արդէն երրորդ անգամ ըլլալով կը կայանայ եւ անիկա Հայաստանը կը վերածէ բնապահպանման հարցերուն
շուրջ լուրջ բանավէճեր ծաւալող միջազգային հարթակի: Անոր ընթացքին ոչ միայն կը ներկայացուին
բնապահպանման վերաբերող ժապաւէններ` աշխարհի շուրջ 30 երկիրներուն լաւագոյնները, այլ
նաեւ կը կազմակերպուին համապատասխան աշխատանքներ, նախաձեռնութիւններ, սեմինարներ եւ այլն: «Արեւորդի»
փառատօնը կը սկսի աւանդական դարձած անասուններու դիմակահանդէս-շքերթով: Աւելի քան 500
մասնակիցներ, որոնցմէ շատեր պատանիներ, անասուններ պատկերող գունագեղ զգեստներով այսօր`
14 հոկտեմբերին Երեւանի եւ մարզերու տարբեր կրթական հաստատութիւններէն կ՛ուղղուին Ազատութեան
հրապարակ, հոնկէ` Հիւսիսային պողոտայով կը հասնին Հանրապետութեան հրապարակ: Ապա մասնակիցները
Նալպանտեան փողոցով կը բարձրանան ու կը համախմբուին Շարլ Ազնաւուրի հրապարակին վրայ,
ուր տեղի կ՛ունենայ բացօթեայ համերգ: